A irmá de Cendón destaca as "boas condicións" do fotógrafo e di que "nunha semana" regresarán a Galicia

SANTIAGO DE COMPOSTELA, 5 Ene. (EUROPA PRESS) -

A irmá do fotógrafo galego José Cendón, liberado onte xunto co xornalista británico Colin Freeman tras 38 días de secuestro en Somalia, Julia Cendón, resaltou hoxe que el "se atopa en boas condicións" tanto "física como psicoloxicamente" e confirmou que regresarán a Galicia "máis ou menos dentro dunha semana".

Segundo explicou Julia Cendón a Europa Press, o seu irmán "necesita descansar" xa que "está esgotado de tantos días de encerro" e comentou que, dende o principio, estivo "convencida da súa fortaleza". "Está ben e para nada esperaba atopalo mal", engadiu. Así mesmo, comentou que o fotógrafo "só baixou un pouco de peso, uns quilitos" pero que "non lle viña nada mal", chanceou restando importancia ao feito.

Precisamente, atopábase no aeroporto cando recibiu ao confirmación da súa liberación por parte do Ministerio de Exteriores, onde "case saltaba de alegría". Pola súa banda, afirmou que os seus pais "puideron respirar por fin unha vez escoitaron a voz de José" por conversación telefónica e que "están moi felices de todo finalizase ben".

En palabras da irmá de Cendón, os secuestradores alimentábanos ben" e "portábanse relativamente ben, dentro do que cabe" e que eles --os dous xornalistas cativos-- "pasaban máis tempo xuntos que un matrimonio". Ademais, afirmou que "coidaban o un doutro" e que se dedicaban a "pasar o anaco con xogos" para solucionar o paso do tempo.

A pesar da preocupación coa que viviron a espera, manifestou que Cendón "é moi forte" e "lévao no sangue", precisou a súa irmá, quen tamén detallou que José "é un galego de pura cepa" e "un cu inquedo nese sentido", xa que "lle encanta o seu traballo e o vive ata o final".

A DÚBIDA DO RESCATE

Sobre o suposto pagamento dun rescate pola liberación de José Cendón, sostivo non saber "nada" e que non cree "que se vaia saber". Neste sentido, explicou que "os secuestradores en moitas ocasións piden cousas a cambio que non teñen que porqué ser diñeiro, por exemplo, que lles proporcionen algo por X tempo".

A súa liberación foi produto das negociacións nas que participaron axentes dos servizos diplomáticos e de intelixencia de España, Reino Unido e Somalia. O embaixador de España en Kenya, Nicolás Martín Cinto, confirmou hoxe que non lle consta "que se pagara rescate". Ademais, asegurou que "España non puxo nin un céntimo" e emprazou a preguntar ao 'Daily Telegraph' --medio para o que traballa Cendón-- sobre se pagou os secuestradores.

Pola súa banda, fontes do Goberno central recalcaron que se limitaron a efectuar "xestións políticas e diplomáticas". Tamén explicaron que nestas negociacións participaron representantes da empresa para a que traballaba o fotógrafo español, que foi secuestrado cando ía rumbo ao aeroporto de Bossaso, despois de estar no norte de Somalia facendo unha reportaxe sobre a pirataría para o xornal 'Daily Telegraph'.