Nace 'Blogues pola Lingua' para defender o galego dos "ataques" dos avogados do "bilingüismo"

   'Blogues pola Lingua' é un novo espazo na rede que acaba de nacer coa vocación de defender o idioma galego dos "ataques" dos que se definen e avogan polo "bilingüismo" pero que esconden "aptitudes contrarias" cara á lingua propia.

   Con estas palabras explicou en declaracións a Europa Press un dos promotores deste espazo, Xabier Pérez Igrexas, quen reivindicou que esta iniciativa se creou de "forma espontánea" por editores e autores de blogs en galego en internet.

   Ao respecto, Xabier Pérez Igrexas deu a coñecer que a intención desta web é darlle continuidade a accións en defensa do galego ante un contexto de "ataques" e subliñou que naceu da "necesidade" que constataron os seus creadores de habilitar un espazo para este labor.

   Non en van, xa son 40 os blogs que se sumaron a este espazo na súa primeira xornada de vida, o cal é "moi significativo", segundo Xabier Pérez Igrexas, e "abre expectativas" de continuidade no futuro, máis alá do obxectivo a curto prazo, que é o de apelar á cidadanía a acudir á manifestación do próximo domingo día 18, convocada por A Mesa pola Normalización Lingüística.

   Precisamente, 'Blogues pola Lingua' adheriuse ao manifesto da asociación en defensa do galego, que leva o título 'Polo dereito a vivirmos en galego' e que xa conta con case 400 apoios de institucións, entidades, concellos, asociacións, sindicatos e formacións políticas.

   Tanto os blogs promotores desta iniciativa como o manifesto e outras informacións de interese se poden atopar na páxina web www.bloguespolalingua.org.