Rajoy asegura que "algo ule a podrecido na Xunta de Galicia" co concurso eólico

SANTIAGO DE COMPOSTELA, 26 Dic. (EUROPA PRESS) -

O presidente do PP, Mariano Rajoy, parafraseou hoxe a célebre cita de Hamlet "algo está podre en Dinamarca" para asegurar, en referencia ao concurso eólico, que "algo ule a podrecido na Xunta de Galicia".

Deste modo, citando a obra de Shakespeare, referiuse Rajoy, durente un acto do PPdeG celebrado en Santiago, ao proceso de adxudicación de megawatios resolto hoxe. "Non imos quedar quietos e faremos canto estea nas nosas mans para que haxa transparencia, seguridade xurídica e nada distinto dunhas adxudicacións dun concurso," dixo, en referencia á repartición de potencia eólica en Galicia.

O líder do PP acusou o presidente da Xunta, Emilio Pérez Touriño, de facer "incumprimento das súas responsabilidades", xa que se os representantes das consellerías do PSdeG abandonaron as reunións "será porque pasa algo" e el, como xefe do Executivo galego, "terá que evitar que pase". Ademais, advertiu de que o PP esixirá responsabilidades "onde teña que facelo".

Para Rajoy, o conflito co concurso eólico é unha mostra máis de que PSdeG e BNG se "levan como o can e o gato" e pelexáronse por todo", dende a lingua e as galescolas, ata o plan acuícola, a vivenda e "agora polo concurso eólico". A característica deste goberno bipartito son, ao seu xuízo, "as leas que xeran todos os días".

CONVENIO DO DIVORCIO

Pola súa banda, o presidente do PPdeG, Alberto Núñez Feijóo, considerou que o concurso eólico "parece ser o convenio económico" do divorcio entre o PSdeG e o BNG. "Estiveron catro anos separados, agora están co divorcio", subliñou, e engadiu que máis adiante "discutirán pola custodia, pero a custodia dos galegos non é posible porque son maiores de idade".

Núñez Feijóo asegurou que o bipartito "remata como empezou: Dividido" pero indicou que o que se iniciou como unha "anécdota", transcende agora coa adxudicación de megawatios que suporá unha "grande cantidade" de diñeiro. Neste sentido, afirmou que Galicia "non resiste máis un Goberno infantil" porque é un pobo "adulto".

O líder dos populares galegos prometeu, coa vista posta nas eleccións autonómicas do próximo 1 de marzo, que dará "a cara" cando unha parte do seu goberno "estea a cociñar un escándalo como o que se cociña neste momento co concurso eólico".

"Unha cuestión destas dimensións pasará polo consello de la Xunta e terá a unanimidade dos conselleiros", sostivo. Comprometeuse, ademais, a que este sexa o procedemento en "calquera outro concurso".

"COVARDÍA" DE TOURIÑO

Núñez Feijóo dirixiu tamén as súas críticas ao conselleiro de Medio, Manuel Vázquez, de quen dixo que é "o emisario da propia covardía política de Touriño". A Consellería de Medio Ambiente, dixo, "está a facer algo que non se atreve a facer" o presidente da Xunta, pero acusou ao responsable da política ambiental de "intentar lavar" os contratos que adxudica Sogama "formulando cuestións de ética e honestidade" na adxudicación de potencia eólica.

"Mentres este concurso siga adiante o escándalo será corresponsabilidade de todo o Goberno", proseguiu, e engadiu que os contratos de Sogama tamén "son responsabilidade de todo o bipartito".

Non obstante, manifestou que as cousas "poden ser diferentes" e pode haber un Goberno "unido" cun presidente que "en vez de escorrerse nos escándalos se negue a que haxa escándalo" e agregou que "nunca" tolerará unha situación semellante á que se vive "nos últimos días do bipartito".