A Xunta destina 74 millóns de euros a mellorar a transformación e comercialización dos produtos pesqueiros

SANTIAGO DE COMPOSTELA 11 May. (EUROPA PRESS) -

A Consellería de Pesca e Asuntos Marítimos tratará de mellorar a transformación e a comercialización dos produtos da pesca, o marisqueo e a acuicultura mediante a utilización dun presuposto de 74 millóns de euros financiados polo Fondo Europeo de Pesca.

Os beneficiarios destas subvencións poderán ser persoas físicas ou xurídicas que sexan titulares de microempresas, pemes e aquelas con menos de 750 empregados e cun volume de negocio inferior aos 200 millóns de euros.

Do mesmo xeito, os proxectos que poderán recibir estas axudas son os que destinen investimentos en activos fixos e materiais novos para a creación, ampliación e modernización das instalacións situadas en Galicia.

Así mesmo, terán por obxecto cuestións relativas á mellora das condicións de traballo, á mellora das condicións hixiénicas e de calidade do produto, á redución do impacto negativo no medio ambiente e á produción ou comercialización de novos produtos; entre outras variables.

Estas axudas, o prazo de presentación de solicitudes das cales remata o 8 de abril, cubrirán gastos de construción, adquisición, ampliación, modernización e acondicionamento de bens inmobles; maquinaria e equipamentos de primeiro uso; gastos do proxecto; instalacións telefónicas e informáticas; e elementos de transporte interno.