UVIÉU, 20 Nov. (EUROPA PRESS) -
Al portavoz parllamentariu actual del PP na Xunta Xeneral, Álvaro Queido, ratificáronlu como presidente de los 'populares' asturianos col 95,83% de los votos nel XVIII Congresu del partíu, celebráu n'Uviéu.
Queipo incluyó na so llista a Beatriz Llanera, que va ser secretaria xeneral, y a nomes como Mario Arias, José Luis Fontaniella, Agustín Iglesias Caunedo, Esther Llamazares o Beatriz Polledo.
El XVIII Congresu, de calter estraordinariu y que clausuró'l presidente del PP, Alberto Núñez Feijóo, celebróse nel Palaciu d'Esposiciones y Congresu Ciudá d'Uviéu col lema 'Juntos Ganamos', según indiquen dende la organización.
Amás, participaron el presidente de la Xunta de Galicia, Alfonso Rueda, y la presidenta de Cantabria, María José Sanz de Buruaga, col vicesecretariu d'organización del PP a nivel nacional, Miguel Tellado.
Álvaro Queipo Somoano yera l'únicu candidatu al recibir l'apoyu de más del 50 por cientu de los votos nes asamblees locales de la primer vuelta del Congresu. Asina, el sábadu 11 de payares, Queipo sacó una ventaya de más de 15 puntos --col 85,14 por cientu-- al otru precandidatu, Javier Brea.
ENSIN CONGRESU DENDE 2017
L'últimu congresu del PP asturianu foi'l 18 marzu de 2017, cuando los afiliaos reelixeron como presidenta a Mercedes Fernández, diputada nacional actual conocida como 'Cherines', que s'impunxo sobre la so única rival, la presidenta del PP d'Avilés, Carmen Rodríguez Maniega.
Sicasí, al llegar Pablo Casado a la Presidencia del PP en xunetu de 2018 optó por Teresa Mallada, expresidenta de la empresa pública Hunosa, como candidata del PP d'Asturies. Meses depués, Fernández dimitiría como presidenta del PP asturianu y sería escoyida senadora.
Coles mesmes, pocos meses depués de llegar Alberto Núñez Feijóo a Xénova, Mallada anunció que daba un pasu al llau. El 29 de setiembre, nuna comparecencia énte los medios, avanzó que nun se presentaría al congresu y que tomara esa decisión en falándolo col presidente nacional, pa buscar xuntos la solución meyor pal futuru del PP n'Asturies.
N'avientu de 2022, Feijóo dio la sorpresa al apostar por Diego Canga, un cargu de la Comisión Europea, como candidatu del PP a la Presidencia del Principáu nes autonómiques. Anque los 'populares' xubieron siete escaños nesos comicios, finalmente nun llograron arrampuñar el Gobiernu al socialista Adrián Barbón.
Unos cuatro meses depués d'aquelles elecciones y hores más tarde de que'l PP asturianu convocara Xunta Directiva p'aprobar tolo relativo a un congresu nuevu, Canga ufiertó una comparecencia na qu'informaba que dexaba'l cargu y que ponía fin a la so carrera política nel Principáu. Dixo que marchaba por motivos personales.
