Moriyón (Foru) pon fin al pactu de Gobiernu con Vox por anteponer les sos sigles al interés xeneral

XIXÓN, 4 Oct. (EUROPA PRESS) -

L'alcaldesa de Xixón, Carmen Moriyón (Foru), anunció esti miércoles la rotura del pactu con Vox, poco depués de los 100 díes del Gobiernu tripartitu, non namás por nun ser capaz d'exercer les responsabilidas que-yos otorgaron los ciudadanos, según ella, sinón porque, al so xuiciu, "antepunxo les sos sigles al interés xeneral".

"Mentes yo sía alcaldesa esti Gobiernu nun va dexar nenguna inxerencia dende Madrid nin dende onde sía", dixo la rexidora xixonesa.

Asina lo indicó, en rueda de prensa nel Consistoriu xixonés, hores depués de que la diputada rexonal y conceyala de Festexos, Sara Álvarez Rouco (Vox), anunciara que planteaben facer cambios nel Festival Internacional de Cine de Xixón (FICX), p'abrise a más públicos, según la llinia del so partíu y alloñáu de "sesgos y partidismos". La mesma Rouco, a entrugues sobre si falara primero colos sos socios de Gobiernu, namás comentó "dalgo diximos".

Moriyón, que tuvo arrodiada de los conceyales del so grupu municipal, anunció que yá firmó la resolución pola que Vox queda fuera del Gobiernu municipal, qu'hasta agora compartíen dambes formaciones polítiques col PP.

L'alcaldesa aseguró que foi una decisión "mui meditada" y que nun respuende namás a la rueda de prensa de Rouco sobre'l FICX. Coles mesmes, destacó que les declaraciones feches pola conceyala de Vox nella "nun tán al altor d'una ciudá como Xixón".

Pa ella, estes palabres atenten contra la tolerancia que siempre caracterizó y van siguir caracterizando a la ciudá. Amás, quixo mandar un mensaxe de tranquilidá a la organización del Festival Internacional de Cine, avalada, según la rexidora, por más de 60 años de "éxitu", amás d'a los trabayadores y a tolos que formen parte del mesmu.

Al empar, dixo que Xixón nun va esperimentar "nengún retrocesu" de llibertaes. "Esta ciudá ye llibre, tolerante y afayadiza", defendió Moriyón.

Tamién llanzó un mensaxe "de tranquilidá dafechu" a la ciudadanía. L'alcaldesa insistió en que los cuatro años vinientes van ser "brillosos" pa Xixón, de la qu'aseguró que tolos conceyales, y ella mesma, tán "comprometíos dafechu" cola ciudá.

"Foru Asturies nun incumplió nengún pactu", destacó. Dalgo que contrapunxo cola actitú de Vox, al qu'acusó de paralizar "conscientemente" el funcionamientu de la organización municipal.

Moriyón, enantes de la rueda de la so prensa y depués de la intervención de Rouco, yá diera pistes de la rotura con Vox al traviés de les redes sociales, con un curtiu "acabóse". Tamién el director del FICX, Alejandro Díaz Castaño, mostrara la so "confianza dafechu" en que Carmen Moriyón diba "defender el festival independiente como siempre foi nos sos años de Gobiernu".

Hai que recordar que, na rueda de prensa, Rouco llegó a anunciar pa esta edición del FICX un gallardón que s'otorgaría a dalgún cineasta que proyecte "lo que Vox quier". Nesti sentíu, faló d'una sociedá "que represente'l trabayu, esfuerciu y respetu a los demás".

Tamién se mostrara en contra d'un festival "pa unos pocos" como según ella yera hasta agora y alertara de que taríen "vixilantes" al conteníu, ensin garantizar la so continuidá o ensin avanzar los cambios que pretendíen introducir nel certame cinematográficu, más allá de que fuera abiertu a tolos públicos y que recoyera valores como los entendía'l so partíu.

A esta polémica polos posibles cambios nel FICX, sumase qu'al empiezu del Gobiernu Rouco avanzó que nun contemplaben contratar espectáculos nos que se promocionara la oficialidá del asturianu. Yá entós l'alcaldesa salió al pasu de les sos palabres p'asegurar que nun se diba dexar de contratar a artistes qu'usaren l'asturianu.