Antón García pasa a ser director xeneral d'Acción Cultural y Normalización Llingüística

PRINCIPADO

UVIÉU, 25 Ago. (EUROPA PRESS) -

L'hasta agora director xeneral de Política Llingüística del Principáu, l'escritor y editor Antón García, va ser el responsable d'Acción Cultural y Normalización Llingüística na Viceconseyería de Cultura, Política Llingüística y Deportes que dirixe Vanessa Gutiérrez.

El Conseyu de Gobiernu del Principáu aprobó esti vienres el nomamientu de 35 direcciones xenerales, ente elles les de la Viceconseyería de Cultura, cartera que nesta llexislatura depende directamente del presidente Adrián Barbón.

Antón García yá foi coordinador de la promoción del asturianu nel Executivu autonómicu nos años ochenta --del so maxín salieron campañes como 'Dí-ylo n'asturiano' o la de la cartelería nesti idioma que tovía ta presente na mayoría de chigres del país, amás de les ayudes a la edición del llibru n'asturianu--.

El director xeneral d'Acción Cultural y Normalización Llingüística ye ún de los más prestixosos escritores del Surdimientu. Forma parte de la Segunda Xeneración y ye autor de noveles, traducciones y poesía. Ente elles se pue destacar 'Díes de muncho', pa munchos la novela más importante de la lliteratura asturiana. Profesor de Lliteratura asturiana y española na Universidá d'Uviéu, en 1992 fundó Ediciones Trabe y foi xerente de delles empreses dedicaes al sector del llibru y la producción audiovisual.