UVIÉU, 22 Mar. (EUROPA PRESS) -
La Factoría Cultural d'Avilés va acoyer esti 27 de marzu, Día Mundial del Teatru, la representación de la versión n'asturianu de 'Setiembre', obra de l'autora canadiense velyne de la
Chenelire escrita orixinalmente en francés.
Trátase d'un monólogu femenín al cargu de la compañía Arte Producciones, protagonizáu pola actriz avilesina Natalia Suárez y dirixíu por José Rico. El músicu Diego Rodríguez encargóse de la banda sonora y Xosé Candel de la traducción al asturianu d'una pieza que, pel momentu, nun se pudo ver en nenguna otra llingua de la Península.
velyne de la Chenelire (Montreal, 1975) ye una escritora y actriz con testos como 'Bashir Lazhar', que llegó al cine en 2011 col títulu de 'Profesor Lazhar' y que ta nel puestu 27 ente les 100 meyores películes canadienses de tolos tiempos.
Per otru llau, 'Setiembre' ye una obra del 2015 qu'algamó l'aplausu de crítica y públicu. N'asturianu estrenóse nel Teatru El Llar de Corvera'l 26 de marzu de 2021 con aforu completu. Amás, foi finalista del Premiu Nel Amaro de Teatru esi mesmu añu.
La obra ambiéntase nel patiu d'una escuela y fala d'una muyer que tien que dir al centru a recoyer a la so fía que ta mala. A partir d'ehí, el testu fala de les rellaciones humanes, del poder de la imaxinación y de los debates alredor de la maternidá.
La representación, entamada pola Estaya de la Llingua del Conceyu d'Avilés, va ser a les 20.00 hores na Sala Escénica de la Factoría Cultural. Les entraes hai qu'acutales per teléfonu nel númberu 985545508, nel whassap 634821613 o nel corréu estayallingua@aviles.es.
