Actualizado 22/07/2009 14:30

El blog candasdenuncia.net promueve l'unvíu de cartes de protesta al Conceyu de Carreño contra la vaquillada d'Ambás

UVIÉU, 22 de Xunetu (EUROPA PRESS)

El blog candasdenuncia.net, conocíu foru informativu y de discusión n'Internet sobre temes d'actualidá del conceyu de Carreño, informó güei del entamu d'una campaña de presión pública que busca que se retire la sovención municipal a les fiestes de la parroquia d'Ambás, por incluyir éstes na so programación el toréu y muerte d'una vaquilla.

Al traviés d'un comunicáu, el blog informó de que "se dio a conocer la situación a delles organizaciones de defensa animal y pidióse al Conceyu, gobernáu por PSOE y IU-Verdes, que desanicie tan brutal práctica nel conceyu". Nesti sen, recordó que "les fiestes tán financiaes y avalaes pol executivu muncipal, y yá l'añu pasáu alvirtióse a les autoridaes sin que dieren contestación dalguna".

Por esti motivu, el blog espón un modelu de carta de protesta pa unviar al Conceyu per parte de los particulares qu'apoyen la causa. La comunicación, dirixida al alcalde, plantega al final dos exixencies: la retirada de la sovención a les fiestes d'Ambás y l'estudiu de la posibilidá de que'l conceyu se declare antitaurín.

De fechu, la carta recuerda que "cada vez más conceyos tán declarándose antitaurinos. Ún de los últimos casos foi'l de Castrillón". Amás, criticó'l fechu de qu'esti tipu de fiestes "nun respuenda a una tradición histórica, más bien paez productu d'una moda morbosa promovida pola televisión, ante la tráxica muerte de dalgunos participantes a esti tipu d'actividaes".

Pa candasdenuncia.net, "resulta especialmente llamentable'l papel de los conceyales d'Izquierda Unida, qu'ocupen les responsabilidaes de mediu ambiente y cultura, y que nes pasaes elecciones municipales recibieron apoyu y contaron cola participación nes sos llistes de miembros de Los Verdes d'Asturies".

Asturianu ofrecido por