El BOPA publica la modificación de la toponimia de Valdés, Muros y Morcín

UVIÉU 25 Jun. (EUROPA PRESS) -

El Boletín Oficial del Principáu d'Asturies (BOPA) publicó esti vienres la modificación de los decretos toponímicos de los conceyos de Valdés, Muros y Morcín.

Asina, L.luarca pasar a tener doble denominación --en castellanu y la forma tradicional n'asturianu--, Muros recupera l'apellíu de 'de Nalón' y La Foz pasa a ser oficialmente La Foz de Morcín. El decretu de Morcín aprobárase pol Conseyu de Gobiernu nel 2007, el de Muros nel 2019 y el de Valdés nel 2014.

Nesi sentíu, dende Iniciativa pol Asturianu criticaron la "vuelta atrás" nel decretu toponímicu del conceyu de Valdés. "Relegar la forma tradicional, non solo a compartir espaciu cola forma yá derogada, sinón a facelo en segundu llugar, va nel sentíu contrariu al establecíu pola llei, convirtiendo a la forma tradicional nun adornu", indicó la entidá.

"Ye obligación de la Conseyería de Cultura y Política Llingüística facer pedagoxía sobre la necesidá de recuperar les formes tradicionales y vixilar el cumplimientu efectivu. Esti usu nun se fixo nestos años en nengún casu col topónimu de la capital de Valdés", señalaron, pa recordar que ye "la primer vez nesta llexislatura, la qu'ha ser la de la oficialidá" na que "se fai esti camín inexplicable de vuelta atrás".