Bruxeles prepara torgues al "abusu de posición" de la distribución al fixar el preciu de la lleche

LLEIDA/UVIÉU, 9 d'Abril (EUROPA PRESS)

La Unión Europea prepara torgues al abusu de posición de la gran distribución al fixar el preciu de la lleche, según avanzó güei en Lleida'l Secretariu d'Estáu de Mediu Rural y Agua, Josep Puxeu.

El grupu d'altu nivel del sector llecheru en Bruxeles ta llegando a una serie de conclusiones que probablemente se traducirán en cambios reglamentarios lexislatives nes que se van a tener en cuenta l'esfuerzu que faen los productores y los ganaderos europeos.

"Nun pue estrozar un sector nun teniendo en cuenta los costos de producción por una guerra lloca d'achatarrar un sector", dixo Puxeu.

"Tanto nel sector del aceite como nel de la lleche'l Gobiernu nun ta dispuestu a dexar que'l xuegu suciu acabe pagándolu'l sector productor", dixo precisando que se refería al abusu de posición na configuración de los precios.

Les conclusiones nun refuguen sanciones, según el secretariu d'Estáu, que plantegó qu'o se llega a la vía del acuerdu y al pactu o l'alministración va tomar midíes.

Puxeu repitió que, dende xunu del 2009 al 1 de xineru del 2010, la subida del preciu de la lleche percibida polos ganaderos foi del 12,9%. "El sindicatu agrariu de Castiella Lleón llamóme mentirosu. Referíase a una baxada del 2% de xineru. La organización a nivel nacional fizo una corrección, yá retiraron l'acusación de mentirosu", dixo Puxeu refiriéndose a la organización agraria Asaja.