Una campaña va animar a que los asturianos brinden con sidra brut estes navidaes

UVIÉU, 30 Nov. (EUROPA PRESS) -

Una campaña va animar a los asturianos a que consuman sidra brut pa brindar nestes feches navidiegues. 'Esta etiquetina ye bien grande. Brindemos con ella' ye'l lema de la campaña que se va difundir, con versiones en castellanu y asturianu, n'Internet, televisión, redes sociales y esteriores ente'l 1 d'avientu y el 6 de xineru.

La campaña presentáronla esti xueves n'Uviéu la directora xeneral de Desarrollu Rural y Industries Agraries, María Begoña López; el presidente d'Otea, José Luis Álvarez Almeida; y el xerente de la DOP Sidra d'Asturies, Daniel Ruiz.

Amás, ente eses mesmes feches más de 101 establecimientos hosteleros van participar en 'Asturias Sidra Brut 2023', una iniciativa impulsada pol Conseyu Regulador de la Denominación d'Orixe pa fomentar el consumu de sidra brut, yá sía en copes individuales o por botelles, con un preciu encamentáu de 2,5 euros. Per otru llau, tamién va haber 'prebes' en superficies comerciales y establecimientos gourmet.

El xerente de la DOP, Daniel Ruiz, destacó que de 40.000 botelles etiquetaes de sidra brut en 2016, pasóse a les 150.000 actuales. El 50% del consumu ye rexonal, mentes que'l restu ye fuera de les nuestres fronteres.

La campaña, que tuvo presente na Estación del Norte énte la llegada del tren qu'inauguró la Variante de Payares, destaca la importancia de la sidra pal desarrollu económicu del mediu rural y pa caltener los elementos identitarios asturianos.

Nesi sentíu, Begoña López llamó a "desestacionalizar" el consumu d'esti productu porque "cada vez que llevantamos una copa de sidra bruc, llevantamos Asturies". Amás, coyó'l guante llanzáu por Otea y comprometióse a tresmitir al presidente Adrián Barbón la necesidá d'utilizar productos asturianos nos actos institucionales.