La 'celebrity' Carmen Lomana, númberu trés de Vox al Senáu por Madrid

MADRID, 18 de Payares (EUROPA PRESS)

La 'celebrity' Carmen Lomana presentaráse a les elecciones del próximu 20 d'avientu como númberu trés de la llista al Senáu por Madrid de Vox, el partíu que fundaron los 'ex populares' Santiago Abascal y Alejo Vidal-Quadras, con un oxetivu principal: zarrar la institución.

Lomana, conocida pola so participación en programes de televisión, podría, en teoría, llograr un escañu na Cámara Alta, puesto que, a diferencia de lo que pasa nel Congresu, nel Senáu nun se vota por un partíu nuna llista zarrada y bloquiada, sinón que se marca individualmente'l nome de los candidatos preferíos. Son los partíos los que deciden l'orde en que figuren los sos candidatos na papeleta.

La 'celebrity', que se presenta como independiente, asocede na llista al abogáu Javier Ortega y al secretariu xeneral de Vox, Iván Espinosa de los Monteros. "Toos ellos van trabayar enforma col principal oxetivu de zarrar esta institución qu'al añu cuesta 52 millones d'euros a tolos españoles", informó'l partíu nun comunicáu.

AMIGA DE MONEDERO, DE PODEMOS

Carmen Lomana yá s'averó tanxencialmente a la política al facer pública la so amistá con Juan Carlos Monedero, cofundador y exdirixente de Podemos, un partíu nes antípodes de Vox. La so relación cuayóse tres un discutiniu nes redes sociales y Lomana llegó a defender públicamente a Monedero cuando ésti viose baxo la lupa de Facienda polos pagos que recibiera dende Venezuela.

La mesma candidata confirmó los sos planes al traviés de Twitter, onde afirmó que la Cámara "namás val pa enchufismos y pagar sueldazos aparentando que faen dalguna función relevante" cuando namás ye, según ella, "un órganu de consulta".

Según Lomana, "munchos implicaos nos ERE y otros casos de corrupción tán nel Senáu", un llugar que tachó de "cementeriu de los elefantes", al que van toos aquéllos a los que los sos partíos nun saben ónde poner. "Namás-yos presta a los políticos p'asitiar a la so xente", insistió.

'COLASÍN' NUN TA EN NENGUNA

Los planes anunciaos por Lomana recuerden a los qu'avanzó'l pasáu setiembre Francisco Nicolás Gómez Iglesias, conocíu como 'Colasín' --investigáu xudicialmente--, qu'anunció que quería ser candidatu al Senáu precisamente pa zarralu.

Sicasí, Gómez Iglesias nun figura en nenguna llista de les publicaes esti miércoles nel BOE, anque na so cuenta de Twitter tovía se presenta como tal.