UVIÉU, 14 Oct. (EUROPA PRESS) -
La Conseyería de Cultura, Política Llingüística y Deporte publicó esti miércoles nel Boletín Oficial del Principáu d'Asturies (Bopa) la concesión de dos llinies d'ayudes, que sumen 200.000 euros y respuenden a un doble compromisu del Gobiernu d'Asturies: reconocer a los y les deportistes de elite y a les entidaes que caltienen el deporte tradicional.
Les resoluciones destinen 149.999,67 euros a los Premios a la Excelencia Deportiva, de los que van beneficiase 39 deportistes, y otros 49.998,93 euros a 14 clubes, asociaciones y federaciones que desenvuelven actividaes rellacionaes el deporte autóctonu. Dos ámbitos diferentes que formen parte d'un mesmu apueste: sofitar el talentu deportivo ensin perder de vista la identidá, el territoriu y el relevu xeneracional.
La conseyería reconoz colos Premios a la Excelencia Deportiva la dedicación de 39 deportistes qu'algamaron la categoría absoluta d'altu nivel nacional o altu rendimientu autonómicu. Trátase d'una llinia de sofitu económicu que pón en valor el trabayu, la constancia y el compromisu necesarios pa competir nes categoríes más esixentes.
Les cantidaes van abonase nun únicu pagu y nun van riquir una xustificación posterior, más allá del certificáu de los requisitos establecíos pa la so concesión.
EL DEPORTE TRADICIONAL, UN PATRIMONIU COMÚN
El Gobiernu d'Asturies tamién refuerza'l so sofitu a les entidaes que trabayen pa caltener y sopelexar les modalidaes deportives tradicionales. Esta segunda resolución distribúi 49.998,93 euros ente 14 clubes, asociaciones y federaciones qu'entamen competiciones, actividaes de iniciación y propuestes de divulgación.
Los bolos, nes sos diferentes modalidaes, y el remu tradicional protagonicen bona parte de los proyectos escoyíos. Les ayudes sofiten iniciatives como la VI Lliga Infantil de Bolu Celta, les xornaes infantiles de bolos cuatriada, el Campeonatu de Bolos del Muséu del Pueblu d'Asturies y distintes actividaes rellacionaes col bolu batiente y el bolu vaqueiru. Amás, va reeditase un manual de iniciación a los bolos cuatriada
Finánciense tamién regates pa dar a conocer el remu tradicional asturianu. Son proyectos empobinaos a asegurar la continuidá d'estes práctiques y a favorecer que neños y mozos entren en contactu con elles dende edaes tempranes.