UVIÉU, 2 Jul. (EUROPA PRESS) -
La Conseyería d'Educación y Cultura del Principáu ta dispuesta a revisar el proyectu pal Chao de Samartín pero ensin arrenunciar a la financiación del Ministeriu de Cultura al traviés del '1% Cultural', según indicó esti llunes el conseyeru en funciones, Genaro Alonso.
Alonso realizó estes declaraciones sobre'l xacimientu de Grandas de Salime depués de que la selmana pasada l'Asociación Profesional de Conservadores Restauradores de Bienes Culturales d'España (ACRE) mostrara la so oposición al proyectu pal castru, calificándolo de "inútil" y "depredador".
Según ACRE, el proyectu mentáu nun ye merecedor de tal financiación pol Ministeriu. Coles mesmes, l'asociación sostién que'l Chao Samartín ostenta la condición de Bien d'Interés Cultural (BIC) y polo tanto "tien la máxima protección xurídica" de tal forma que nun refuga recurrir a toles víes p'atayar un "proyectu incorrectu". "Les actuaciones propuestes puen resultar mui lesives", alerta.
Nesi sentíu, Genaro Alonso asegura que les alministraciones consideraren que'l proyectu mentáu "daría solución" al afitamientu y restauración del Chao, anque muestra disposición a estudiar "en detalle" los argumentos que dan los restauradores.
"Naide quier facer dañu a un xacimientu d'esa categoría y esa relevancia", dixo'l conseyeru, remarcando que quier facese "bien". "Si hai que revisar dellos aspectos pa una meyor actuación sobre'l Chao, naide va tar en contra d'eso", dixo.
Sicasí, Genaro Alonso incide en que "d'ehí a prescindir o arrenunciar l'apoyu del Ministeriu, que ta concedíu, hai un cachu". "Va haber qu'introducir delles garantíes si los técnicos asina lo valoren y nós tamos d'alcuerdu, pero nun podemos permitinos el luxu de perder la financiación del Ministeriu", argumentó.
Andalucía
