Emilio Huerta (IU) afirma que Graciano Torre tien una empresa constructora

UVIÉU, 19 de Payares (EUROPA PRESS)

   El conceyal d'IU nel Conceyu d'Uviéu, Emilio Huerta 'Triqui' afirmó esti miércoles que la empresa OCA Construcciones y Proyectos "ye d'un conseyeru" del Gobiernu asturianu. A preguntes, nuna rueda de prensa n'Uviéu, pol nome del dirixente rexonal dixo que ye'l titular d'Economía y Empléu, Graciano Torre y que 2lo sabe tol mundu".

   Emilio Huerta fizo esta afirmación nuna rueda prensa ofrecida n'Uviéu sobre un discutiniu nes obres d'un colexu, nes que participa la empresa mentada.

   La so afirmación llega díes dempués de qu'otra conseyera del Gobiernu asturianu, la titular de Bienestar y Vivienda, Esther Díaz, dimitiera del cargu en faciéndose pública la so participación accionarial na empresa Davelco, que participó n'obres públiques n'Asturies.

   Na rueda prensa n'Uviéu, Emilio Huerta dixo que nun entiende qu'haya problemes ente la Conseyería d'Educación cola constructora, dao que la empresa "ye d'un conseyeru".

   Foi darréu, ante la insistencia de los periodistes, cuando Huerta refirióse a Graciano Torre. De primeres, dixo que nun s'acordaba del nome del dirixente rexonal, pero a lo último afirmó que se trataba de Graciano Torre. Darréu, matizó que la compañía yera de "Graciano Torre o del fíu, dame igual" y refirióse a les distintes maneres de tapecer la titularidá nuna empresa.