Emir Kusturica denuncia que Cannes vetó la so película por apoyar a Putin

MADRID, 20 d'Abril (EUROPA PRESS)

El cineasta Emir Kusturica denunció que la so última película, 'On the Milky Road', refugóse nel Festival de cine de Cannes por razones polítiques. Según el director serbiu, la cinta nun s'aceptó porque apoya al presidente rusu Vladimir Putin.

Kusturica, ganador en dos ocasiones nesti certame, criticó que "la política interfier cada vez más nel Festival de cine de Cannes" y aseguró a l'axencia Russian News Service que la so película nun va competir esti añu por cuestiones ayenes a la calidá de la cinta: "Barrunto que daquién ordenó que la mio película nun tendría qu'aceptase".

El mesmu director almitió que 'On the Milky Road' presentóse un día dempués del plazu establecíu pol festival, pero matizó qu'eso nunca foi un problema n'otres ediciones y que simplemente foi una escusa. "La película presentóse, pero naide la vio", sentenció.

Nos últimos años, Kusturica mostró'l so apoyu al líder rusu y al Kremlin nel conflictu con Ucrania, país nel que'l pasáu añu nun pudo actuar col so grupu de música. Ello ye que la selmana pasada'l cineasta actuó cola so banda Non Smoking Orchestra en Paris, onde empezó l'espectáculu col himnu rusu.

VA ESTRENASE ESTI BRANU EN RUSIA

'On the Milky Road' ta basada n'unu de los episodios de l'antoloxía 'Palabras de dioses' que dirixó Kusturica. La trama céntrase nuna serie d'etapes crítiques na vida d'un home y el so país y ta protagonizada por Monica Bellucci y el mesmu cineasta. Ta previsto que 'On the Milky Road' estrénse en Rusia a últimos d'agostu nel festival Bridge of Arts.

El director ganó en dos ocasiones la Palma d'Oru, el máximu galardón qu'otorga'l Festival de Cannes. La primer ocasión foi en 1985 con 'Papá está en viaje de negocios', y diez años dempués volvió recoyer el premiu por 'Underground'.