El Festival Nel Amaro acueye esti vienres la representación de 'Perendi', de La Compañía del Alba

UVIÉU 3 Oct. (EUROPA PRESS) -

El VIII Festival Nel Amaro de Teatru Profesional en llingua asturiana, qu'entama la Conseyería de Cultura, Política Llingüística y Deporte, acueye'l 4 d'ochobre a les 20.00 hores la representación de 'Perendi', de La Compañía del Alba.

El premiu Nel Amaro ta convocáu por Cultura nel contestu de los premios lliterarios y artísticos en llingua asturiana y gallego-asturianu col oxetivu de fomentar la creación nes llingües propies d'Asturias. A él puen concurrir empreses del sector cultural dedicaes a la producción y representación d'espectáculos teatrales.

La obra fala de Marina, que quier escapar de Perendi. Sicasí, enantes de marchar, tien que buscar la materia pal trabayu d'investigación que-y facilite acceder a una plaza d'investigadora asociada na Universidá de Wisconsin: la obra pictórica d'un estrambóticu artista siriu inmigráu nel conceyu, dotáu del don de la profecía pictórica y augur de defunciones y catástrofes.

Pelos cuadros d'Ahmad Rami desfila una sociedá semirrural decadente que, como caún de los sos componentes, muerre d'una manera tan irremediable como ridícula. La obra ye una adaptación escénica d'una parte de los relatos publicaos por Milio Rodríguez Cueto, nel diariu 'La Nueva España', ente los años 2000 y 2010.

La representación va facese nel Teatru Filarmónica d'Uviéu con entrada llibre y gratuita hasta completar aforu. El Premiu , dotáu con 6.000 euros, convócase col fin de consolidar, arriquecer y prestixar la llingua asturiana y el gallego-asturianu nel ámbitu del arte dramáticu. Amás, el Principáu promueve la representación de la obra pela xeografía asturiana al través del programa Autores nel Camín.

El premiu y el festival lleven el nome del autor turonés Nel Amaro (1946-2011), consideráu una referencia fundamental na vanguardia teatral en llingua asturiana. Nel Amaro foi, amás, l'autor al que se dedicó la edición de la Selmana de Lletres Asturianes en 2021.