El Gobiernu d'Asturies promociona los Alimentos del Paraísu Natural nos festivales Tsunami Xixón y Xixón Life

   XIXÓN, 16 Jul. (EUROPA PRESS) -

   El conseyeru de Mediu Rural del Principáu d'Asturies, Marcelino Marcos, destacó esti miércoles que'l Gobiernu autonómicu da "un pasu más" na promoción de los productos de calidá asturianos dientro de la marca 'Alimentos del Paraísu Natural', cola so presencia en dos festivales de música con gran arribación de públicu, como son el Tsunami Xixón y el Xixón Life.

   Asina lo indicó, en declaraciones a los medios de comunicación, na so visita al 'estand' dende'l que se van ufiertar degustaciones d'estos productos con denominación d'orixe y ecolóxicos.

   Nesti sentíu, resaltó que ye la primer ocasión na que llevaren a cabu la promoción en dos festivales d'estes característiques, a lo que s'amosó convencíu de que ye "una bona oportunidá".

   Según el conseyeru, trátase de unir los productos asturianos cola cultura, coles distintes franxes d'edá, coles tradiciones y trátase de treslladar a los visitantes que vengan a estos dos festivales, que potencialmente van ser más de 60.000 persones, "les bondaes que tienen esti tipu de producciones", remarcó.

   Al tiempu, incidió en que dambos son dos festivales cola presencia d'artistes de gran relevancia como pue ser Joaquín Sabina, Leiva o Juan Luis Guerra o dientro del Tsunami como los Sex Pistols.