'Hazte Oír' afirma que Ripa (Podemos) "ta contra les cuerdes" al avanzar el procesu xudicial

UVIÉU, 11 Abr. (EUROPA PRESS) -

El director de campañes de 'Hazte Oír', Miguel Vidal, aseguró esti miércoles que'l secretariu xeneral de Podemos n'Asturies, Daniel Ripa, "ta contra les cuerdes porque cada vez más se siente acosáu pola Xusticia", al conocese l'Autu del Tribunal Superior de Xusticia d'Asturies (TSXA) pol qu'asume la causa contra Ripa y el restu d'investigaos pola griesca col autobús de la organización en mayu del añu pasáu.

Vidal recordó en declaraciones a Europa Press que "los fechos son contundentes". "Ripa taba nel grupu de los violentos, dába-yos instrucciones, rompieron l'autobús, coaccionáronnos y torgaron que pudiera circular y que yo mesmu pudiera espresame", señaló.

Agora, dixo, "la Xusticia ta faciendo'l so trabayu". Esti autu xudicial, "al igual que les trés resoluciones xudiciales que dieron la razón a la campaña informativa del #HOBUs", "afala" a la organización a "siguir concenciando a la sociedá española de lo que ta detrás del adoctrinamiento de xéneru qu'imponen les lleis 'LGTBI' impulsaes o apoyaes por Podemos: una ideoloxía totalitaria qu'amenacia gravemente los derechos de los neños y de los sos padres y les llibertaes de tolos ciudadanos".

El director de Campañes de HazteOir.org recordó que los dirixentes de Podemos protagonizaron la violencia contra'l so autobús y los sos ocupantes en delles comunidaes autónomes. Asina, mentó "violentos ataques" en Sevilla, col númberu dos de Podemos Andalucía, Francisco Artacho. "Lo mesmo asocedió en Santander cola diputada de la mesma formación política Verónica Ordóñez, y en Logroño, col conceyal Gonzalo Peña", señaló.