Identifiquen un posible tratamientu pa la metástasis del cáncer

MADRID, 22 de Xunu (EUROPA PRESS)

Investigadores del Hospital Infantil de Boston, n'Estaos Uníos, aislaron un potente anulador de la metástasis tumoral que producen les célules que puen emplegase como tratamientu anticanceríxenu. Los resultaos del estudiu publíquense na edición dixital de la revista 'Proceedings of the National Academy of Sciences'.

La metástasis, la migración de les célules del cáncer a otres partes del organismu, ye una de les principales causes de mortalidá por cáncer y nun s'aprobó una terapia p'anular o tratar les metástasis.

Los científicos descubrieron que los tumores metastáticos preparen los órganos distantes pa producir la metástasis al producir ciertes proteínes que fomenten el crecimientu tumoral y atraen vasos sanguíneos pa dar un soporte al tumor. Agora, los investigadores muestren que los tumores non metastáticos dixebren una proteína llamada prosapina, qu'anula la metástasis al causar la producción de factores que bloquien el crecimientu de los vasos sanguíneos.

Los investigadores descubrieron que les célules de los tumores de mama y próstata que nun producíen metástasis dixebren altos niveles de prosaposina mientres que los tumores metastáticos dixebren mui poca.

Cuando los investigadores inyeutaron a ratones célules tumorales que yeren mui metastátiques pero a les qu'añadieren prosaposina, la metástasis pulmonar redúxose nun 80 por cientu y la de los nódulos linfáticos elimnóse por completu, amás d'aumentar el tiempu de sobrevivencia de los animales. Per otru llau, al suprimir la espresión de prosaposina nes célules tumorales, observaron más metástasis.

Los resultaos tamién mostraron qu'al inyeutar la prosaposina de manera directa a los ratones que recibieren una inyeición de célules tumorales, estes célules nun formaron metástasis nos pulmones o si lo ficieron, yeren muncho más pequeñes. Estos ratones vivieron polo menos un 30 por cientu más tiempu que los ratones que nun recibieron la prosaposina.

Los científicos tamién demostraron que la prosaposina estimula l'actividá d'un supresor tumoral bien conocíu polos científicos, denomináu P53, nel texíu conectivu del entornu del tumor. Esto a la so vez estimulaba la producción de trombopospondina-1, un anulador natural del crecimientu de los vasos sanguíneos, tanto nel texíu conectivu como nes célules de la llocalización distante.

Según esplica Randoph S. Watnick, responsable del estudiu, "la prosaposina, o los derivaos qu'estimulen l'actividá de p53 d'una manera asemeyada nel tumor del texíu conectivu, pue ser una forma eficaz p'anular el procesu de metástasis nos humanos".