Iglesias (IU) exixe a Fernández que seya "rebelde por Asturies" ante'l Gobiernu de Rajoy

EUROPA PRESS

UVIÉU, 23 de Mayu (EUROPA PRESS)

El voceru d'IU na Xunta Xeneral d'Asturies, Jesús Iglesias, reclamó al candidatu del PSOE a la Presidencia d'Asturies, Javier Fernández, que seya "rebelde" frente al gobiernu central lideráu por Mariano Rajoy. "Si nun se rebela por Asturies, cuerre'l riesgu de que los asturianos se rebelen contra usté", alvirtió-y.

Na sesión plenaria d'elección del presidente, Jesús Iglesias, pidió asina al dirixente asturianu una mayor contundencia en defensa de los intereses asturianos en cuestiones como les polítiques del déficit, la minería, la política industrial o les infraestructures. Según el diputáu d'IU, los asturianos van sentise "cómodos" si'l so presidente muestra esa rebeldía que demanda.

Na so intervención ante Javier Fernández, únicu candidatu, el voceru d'IU recordó l'amenaza del ministru de Facienda, Cristóbal Montoro, d'una intervención n'Asturies. Según el dirixente d'IU, lo que fizo Montoro foi una "indignidá" y una "agresión" a Asturies, a la que causó dañu cuando otres comunidaes autónomes gobernaes pol PP, Madrid y Valencia, "tapecieron un déficit de 4.000 millones".

N'otra cuestión que reclama a Javier Fernández "enerxía" nes sos relaciones col gobiernu d'España ye en tolo relativo a la política industrial qu'Asturies, pola so tradición y historia, precisa "más que naide". L'oxetivu, comentó, ye evitar posibles desllocalizaciones de multinacionales instalaes n'Asturies, como ArcelorMittal. "Alguién va tener que falar colos responsables d'eses empreses, pero apoyáu pol Gobiernu d'España", dixo Iglesias, que señaló qu'ésti nun ye un problema d'Asturies, sinón nacional.

D'acordies colo anterior, Iglesias demandó al futuru Gobiernu rexonal que defenda al sector de la minería ante la reducción d'ayudes a la producción y de fondos mineros que realizó'l gobiernu central, algo que significaría dexar a les comarques mineres "a la so suerte". Dixo que ta en peligru la cohesión social y que les empreses van tener que zarrar en meses, nel escenariu actual.

Tamién esixó "contundencia" a Javier Fernández en relación a la reclamación de les grandes infraestructures asturianes que tán pendientes de rematase, como l'autovía del Cantábricu o la conexón d'alta velocidá cola Meseta.

Iglesias criticó tamién el procesu de reestructuración financiera que se promovió a nivel nacional, y dixo que delles caxes d'aforros, como Caxastur, que funcionaben bien, "llamináronse" xunto coles que funcionaben mal, nun procesu de "lloca dinámica" del que naide conoz el final.

RECORTES Y REDUCCIÓNES DEL SECTOR PÚBLICU

El voceru d'IU refirióse tamién a los recortes que yá anunció que tendría que realizar Javier Fernández. Asina, pidió concreción en relación a en qué van consistir esos recortes y preguntó a Fernández si va refugar la salida del sistema sanitariu de los inmigrantes, o si va oponese al aumentu de les tases y d'alumnos por aula en materia educativa.

En tou casu, Iglesias pidió al candidatu socialista'l "compromisu" de que polo menos esos recortes van realizase de manera coyuntural y que nun van ser estructurales. Esto ye, que namás s'aplicarán nestes circunstancies y que dempués los ciudadanos volverán recuperar los sos derechos.

Iglesias tampoco comparte la necesidá de reducir el sector públicu, porque nun piensa que seya la solución. "Nun aceptamos que'l sector públicu seya un mastodonte", afirmó na so intervención, anque dixo que nun se nieguen a un procesu de "reorganización".

LLINGUA

Amás, el voceru d'IU pidió a Javier Fernández un mayor compromisu cola llingua asturiana. Nesti sen, demandó-y mayor "voluntá política".

Iglesias confórmase con que dende les files socialistes señalaren que, ante la cooficialidá, nun se van oponer nin van ser una torga, igual que ficieron ante la pretensión d'UPyD de llograr una circunscripción única. "L'asturianu tien que dexar de ser tema de conflictu", apuntó Iglesias.,

IU tovía tien pendiente de decidir si a lo último va entrar nel futuru gobiernu rexonal lideráu por Javier Fernández, al que va dar el so apoyu na investidura. Iglesias dexó claro que nun ye partidariu de la fusión de conceyos o de la desapaición de la Procuradoría, puntos incluyíos col acuerdu de PSOE con UPyD.

"Ánimu, fuerza y suerte", deseó-y Iglesias a Fernández. Y mostróse partidariu d'un acuerdu de concertación social "sin reserves" pa encarar la situación. "Esos acuerdos fueron buenos p'Asturies", sentenció.