LONDON, 20 Ago. (EUROPA PRESS) -
Hai poco atoparon una entrevista inédita del ex Beatle John Lennon onde esti da dalgunes claves pa entender porqué se separtó'l grupu, amás de la consabida mala rellación ente estos y la escéntrica muyer de Lennon, Yoko Ono.
La conocida revista musical 'Rolling Stone' va asoleyar un sorprendente documentu, onde un cabreáu John Lennon se desfoga col editor Jann Wenner. Esti decidió facer públiques les cintes pa sofitar al famosu periodista Mikail Gilmore, quien s'alcuentra faciendo una investigación sobre la dixebra de la mítica banda.
"Vendímosnos... y atópome asquiáu por ello", quéxase'l cantante de 'Imagine' en ciertu momentu la grabación. Tamién afita que la rotura'l grupu víase venir dende hai munchu tiempu, darréu que la so música "taba muerta" dende qu'algamaron el primer éxitu al entamu los 60 y que, por esti motivu, nunca llegaron a ameyorar.
Escontra quien más arremete Lennon ye, quiciabes, escontra Paul McCartney, a quien acusa de querer ser el cabezaleru'l grupu: "Cansámosnos de ser los segundones de Paul", diz Lennon no que cinca a él y a Ringo Star y George Harrison.
Tamién tien pallabres de rensía hacia'l grupu pola mena en que "insultaren" a la so pareya, Yoko Ono. "Ellos despreciáronla... paecía que tenía d'elixir ente tar felizmente casáu con ellos o con Yoko. Y elixí a Yoko".
Lennon tamién acusa a George Harrison, de ser el que más duramente malmetió escontra l'artista: "George insultóla na so cara y yo nun-y pegué, nun sé porqué. Ringo portábase meyor pero los otros dos realmente mancáronmos. Enxamás los perdonaré".
L'artículu 'La Ruptura de los Beatles', escritu pol espertu Mikail Gilmore, sedrá asoleyáu nel númberu viniente de la revista 'Rolling Stone'. Con seguranza esti sofitáranos a comprender meyor lo que foi'l final de la célebre banda y, con ella, d'una domina.
