'La jungla. Un buen día para morir': "Yippee-ki-yay" na Madre Rusia

MADRID, 15 de Febreru (EUROPA PRESS - Israel Arias)

Bruce Willis métese na quinta vez na piel de John McClane y viaxa hasta Rusia pa, faciendo gala de la so sutileza avezada, realcontrase col so fíu.

Unos cuantos años dempués de resucitar cinematográficamente pa meter nel xaréu a la so fía, y salvar el mundu de l'amenaza ciberterrorista, John McClane vuelve a la carga pa compartir col so fíu persecuciones, tiroteos, mocaes y esplosiones en 'La Jungla: Un buen día para morir'. Una cinta cola que, de pasu, celebra'l cuartu de sieglu de la exitosa saga.

John Moore, que dende 'Max Payne' nun paez qu'aprendiera muncho, robla esta escesiva desvergüenza carente de cualquier sen del pudor, que namás s'apoya nel vieyu carisma que tovía caltién el so protagonista. El deu acusador nun debe tampoco escaecer a Skip Woods, guionista responsable de los llibretos de xoyes como 'Operación Swordfish', 'Hitman' o 'El Equipo A'.

CAMÍN DE RUSIA

Nesta ocasión el vieyu John entérase de que'l so fíu, al que da vida Jai Courtney ('Spartacus: Sangre y arena'), ta presu nuna cárcel de Moscú. Va años que nun se falen, pero un padre ye un padre. Asina que, sin pensalo dos veces, McClane súbese a un avión camín de Rusia pa intentar iguar les coses, pero esta vez ta decidíu a nun piciala. Promételo a la so fía (la nesta ocasión fugaz Mary Elizabeth Winstead).

Yá en tierres ruses, va descubrir que'l so fíu ye un axente de la CIA que vela por que políticos corruptos y belicosos nun se faigan col poder nel Gobiernu rusu. Y como, a pesar de que'l so propósitu d'enmienda yera sinceru y decidíu, a John los años enseñáron-y munches coses pero non a tar quietu... tenemos a dos McClane armaos y enfadaos -colos malos, y ente sí- sueltos per Moscú. Un poder de destrucción que nin siquier la Madre Rusia ye quién a soportar.

Y nesti puntu, cola raquítica trama yá plantegada, entrar en cualquier tipu de reflexón sobre la calidá cinematográfica de 'La Jungla: un buen día para morir', más p'allá de la so consideración como militante del segmentu nostálxico-palomiteru más puru -y duru-, sería tan inútil como preguntar por qué Hollywood desenterró un cadabre tan guapu como'l de John McClane.

Pero lo cierto ye que lo fizo -hai yá casi cinco años- y que, como otros productos de corte asemeyáu -ehí tán los regresos de 'Rocky', 'Rambo' o la saga 'Los Mercenarios'- vuelve ser una cinta namás indicada pa los qu'aseñarden a los héroes ochenteros. Ellos, y namás ellos, van poder pasalo en grande viendo a los McClane estrozándolo too mientres el vieyu John suelta les mesmes chancies a toes manes.

GASTADURA Y ESAXERACIÓN

Y ye que, como asocedía na anterior entrega de 'La Jungla', una parte de la esencia de la saga -la del 'cowboy' solitariu tornáu n'héroe involuntariu- difuminóse dafechu, y la otra -na que McClane arreglábase p'acabar con esbirros que, nel meyor de los casos, quintuplicábenlu en númberu- esaxeróse hasta tornar los descomanaos fueos d'artificiu nel fin y non nel mediu.

Al restu, a los que nun recuerden con cariñu a Bruce Willis en camiseta blanca de tirantes y colos pies ensangrecíos, paecerá-yos una cinta mediocre con una trama cuantimenos absurda. Una enguedeyada concatenación de secuencies d'acción tan aparatoses como inverosímiles. Y anque servidor seya de los primeros, de los qu'aplauden como borra col "Yippee-ki-yay", el restu tien tola razón.