UVIÉU, 20 de Marzu (EUROPA PRESS)
L'Asociación de Trabayadores de la Normalización Llingüística denunció nun comunicáu'l "recorte escomanáu y malintencionáu de les hores de llingua asturiana nel nivel de bachilleratu propuestu nel borrador del currículu mandáu a los centros educativos asturianos".
Ye esti un retayu que fai pasar de cuatro a una hora d'asturianu en bachiller, esplica l'asocaición, siendo una "etapa educativa yá condenada a númberos mínimos pola imposibilidá d'apaecer como materia evaluable na PAU y que yá contaba, pa más, con una ratio esixida pa impartila".
Abúlta-y llamativo al colectivu "el fechu de que va bien poco la Conseyería afalagaba los nuestros oyíos falando de la necesidá de crear la especialidá docente de llingua asturiana y pidía esplicaciones al Ministeriu por negánoslo, afirmando que si les competencies yeren de calter autonómicu, Asturies diba exercer la so competencia y diba regular la especialidá del profesoráu d'asturianu".
Critica que'l Gobiernu asturianu achaque "la situación de la llingua asturiana na nuestra Educación al mesmu Ministru, demostrando un victimismu que nun ye propiu d'un cargu qu'ha asumir les sos propies responsabilidaes sin volcar les propies miseries pa fuera y asina desfacese del pesu del fardel".
Na opinión de l'Asociación, "agora tenía la oportunidá de demostrar lo que daveres quería y podía facer pa col asturianu; y ta demostrándolo bien: nun hai otru enfotu per parte de la Conseyería d'Educación que desprestixar, arrasar y sentenciar de muerte una intervención educativa necesaria dafechu nel procesu de recuperación y sobrevivencia d'una llingua; arrastrando con ello al desamparu total a tou un colectivu d'enseñantes que, d'equí a bien poco, ta condergáu a desapaecer".
Andalucía
