OVIEDO, 31 Ago. (EUROPA PRESS) -
El Conseyu de Gobiernu aprobó esti martes los currículos d'Enseñanza Secundaria Obligatoria (ESO) y Bachilleratu adaptaos a la LOMLOE, onde la llingua asturiana gana tres hores y s'introducen conteníos sobre la memoria democrática asturiana.
L'asturianu, que sigue como optativa, pasa en 4.u d'ESO de tres a dos hores selmanales y en Bachilleratu pasa d'una a tres en cada cursu. Otra manera, va haber asignatures vinculaes a la dixitalización y, dientro del marxe autonómicu, va ufiertase Filosofía y Legáu Clásicu.
Na adaptación de la llei al ámbitu autonómicu, según indiquen dende'l Principáu, la Conseyería siguió les premises de la conocencia de la realidá asturiana, incluida la llingua, o'l trabayu per proyectu y ámbitos.
Nes dos etapes, los currículos introducen conteníos pa la conocencia de la memoria democrática d'Asturies. Na ESO intégrase nos cuatro cursos na asignatura de Xeografía y Historia, concretamente nel bloque de saberes básicos Sociedá y territorios.
Nel primer cursu de Bachilleratu inclúyese na asignatura de modalidá Historia del Mundu Contemporaneu, nos bloques denominaos Sociedaes nel tiempu y Compromisu cívicu. P'acabar, en segundu de Bachilleratu l'estudiu de la memoria democrática diversifícase en delles asignatures que complementen los conteníos con trabayos collaborativos y actividaes extraescolares.
P'acabar, en Bachilleratu, Educación adaptó les enseñances a les peculiaridaes d'Asturies cola introducción de conteníos y procedimientos nes distintes materies que permiten conocer el patrimoniu cultural asturianu nel so más ampliu contestu.
