L'ERTE alcordáu n'Arcelor Mittal, que va afectar a 7.000 empleos, garantiza'l 90% del salariu brutu

BILBAO, 4 Oct. (EUROPA PRESS) -

L'Espediente de Regulación Temporal d'Empléu (ERTE) pactáu en distintes plantes d'Arcelor Mittal n'España colos sindicatos CCOO, UXT y USO va tener vixencia dende esti miércoles hasta'l 31 d'avientu d'anguaño y afectaría potencialmente a 7.000 trabayadores, según confirmaron fontes de la empresa y sindicales a Europa Press.

Esta midida, que garantiza'l 90% del salariu brutu y nun va afectar a pagues nin a vacaciones, afecta a les sociedaes Arcelor Mital España S.A., Arcelor Mital Distribución S.L., Arcelor Mital Distribución Norte SL y Arcelor Mital Amds Processing.

En concreto, les plantes nes que se va aplicar esti ERTE de trés meses son les d'Asturies (Xixón y Avilés), Etxebarri, Lesaka-Legasa, Sagunto, Salvatierra y los 17 centros de distribución repartíos per tola xeografía española.

En funcion de cada centru de trabayu, establecióse un porcentaxe d'aplicación máxima na xornada anual, siendo la planta d'Etxebarri, con 350 trabayadores, la que taría más afectada, con un porcentaxe del 50%. Per otru llau, na ACB de Sestao nun sería d'aplicación esti ERTE.

La empresa precisó qu'esti ERTE vien motiváu pola situación actual de "mui altes" importaciones estracomunitaries y demanda baxa en dellos productos como lata -nel que se centra la planta d'Etxebarri-, alambrón, bobina prelacada y bobina galvinazada.

Nel casu de les plantes d'Asturies el porcentaxe d'aplicación máxima na xornada anual ye un 15%, en Lesaka un 35%, en Sagunto un 5%, Amds Processing un 40% y Distribución un 20%. Fontes de la empresa señalaron que tovía nun se definió cuálos son les plantes nes que se va empezar a aplicar el ERTE, a valir dende güei, y va depender de la situación de cada centru y de les sos necesidaes.

L'alcuerdu zarráu na última xunta negociadora garantiza'l 90% del salariu brutu y nun va afectar a pagues nin a vacaciones. Coles mesmes, según apuntaron fontes de CCOO, va haber un siguimientu d'aplicación a nivel local al traviés de les comisiones de siguimientu del ERTE.

El sindicatu precisó tamién, en rellación a la xunta de la comisión de redacción de testos del Alcuerdu Marcu, que'l grupu de trabayu yá remató les xeres d'adaptación de testos y se mandaron les conclusiones a la Comisión Negociadora del Alcuerdu Marcu que va aconceyar en feches próximes.