L'eurodiputáu socialista asturianu Jonás Fernández defende "ensin fisures" el tratáu con Mercosur

   UVIÉU, 22 Ene. (EUROPA PRESS) -

   El diputáu asturianu del Grupu de l'Alianza Progresista de Socialistes y Demócrates nel Parlamentu Européu, Jonás Fernández, defende "ensin fisures" el tratáu de la Unión Europea con Mercosur. Amás, niega que'l tratáu implique menos controles sanitarios o que perxudique al sector primariu.

   Asina lo asegura nun artículu tituláu 'En defensa del alcuerdu con Mercosur' espublizáu nel diariu asturianu La Nueva España y recoyíu per Europa Press. La publicación produzse un día dempués de que'l plenu del Parlamentu Européu alcordara por una diferencia d'apenes diez votos denunciar l'alcuerdu UE-Mercosur énte'l Tribunal de Xusticia de la Unión Europea (TJUE). Fernández, al pie de compañeros del so grupu, forma parte del bloque que s'asitió en contra de llevar el tratáu al Tribunal.

   De toes formes, Fernández restó importancia a esa decisión impulsada pola 'estrema-derecha' y representantes de la 'verdadera esquierda'. Al so xuiciu, solamente va suponer un aplazamientu nel marcu d'una táctica dilatoria que nun compromete la entrada a valir del pactu comercial.

   Al igual que n'otros puntos d'España, la pasada selmana Uviéu foi escenariu d'una gran manifestación de profesionales del campu en contra del tratáu de Mercosur.

   Sicasí, Fernández quixo nel so artículu desmontar los argumentos que se vienen dando relativos al sector primariu en contra del alcuerdu. D'esta forma, el socialista negó que se vaiga a abrir les puertes a productos que nun respeten la normativa europea de calidá alimentaria.

   Pa el, ye un argumentu basáu na "falsedá recurrente" y afirmó que la Unión Europea va siguir esixendo'l cumplimientu de toles midíes fitosanitaries y sanitaries a cualquier importación. "Nun esiste nin una sola llinia qu'alterie les actuales polítiques de calidá y seguridá aliimentaria", indicó.

   Ye más, apuntó que los controles tanto en frontera como nos países d'orixe van incrementase precisamente pa que se cumpla lo alcordao.

   Fernández tamién salió al pasu de los que dicen que nos países del Mercosur los costos, incluyíos los salariales, son menores y la competencia nun ye xusta. Nesti puntu, l'eurodiputáu recordó qu'en países del Mercosur como Brasil o Arxentina los tipos d'interés oficiales superna el 15 o 25 por cientu, mientras que'l sector primariu européu disfruta de uan Política Agrícola Común (PAC) que complemanta sustancialmente les sos rentes.

   Punxo l'exemplu de la carne de vacunu. Jonás Fernández afirma qu'anguaño les importaciones de carne de Mercosuro suponen 200.000 tonelaes al añu, suxetes a distintos tipos d'aranceles. Con éses, l'alcuerdu con Mercosur supón una cuota máxima d'importaciones de 99.000 tonelaes suxetes a un arancel del 7,5%, indicó. Va esistir amás un sistema de monitoreo d'esos aranceles, non solo pal vacunu.

   A los productores asturianos, Jonás Fernández llanza'l mensaxe de que la bona calidá de los sos productos pue tener bona acoyida en consumidores d'esos países. Refirióse, por casu, a les empreses de sidra y vinos asturianos, qu'anguaño abonen un arancel cimeru al 35 por cientu. Col tratáu va amenorgase bien sensiblemente.

   A lo último, dixo que'l sector primariu va poder aprovechase de que col tratáu va suponer la llegada a España de productos como fertilizantes o piensos a un preciu muncho meyor, amenorgando los costos que tienen qu'encarar los profesionales.

NUN YE NAMÁS EL SECTOR PRIMARIU

   Jonás Fernández dixo qu'una de les razones poles que sofita l'alcuerdu con Mercosur ye porque tien bien en cuenta los intereses d'Asturies.

   Nesti puntu, esplicó que'l tratáu non solamente afecta al sector primariu, sinón que va suponer oportunidaes clave n'árees industriales y de servicios pa empreses asturianes. L'aforru de costos arancelarios pa los europeos suma 4.000 millones d'euros añales, facilitando la medría de les esportaciones alredor del 60 por cientu, por un aumentu de les importaciones daqué cimera al 10 por cientu, esplicó.

   Dixo tamién que'l desarme arancelariu va afectar fundalmentalmente al sector d'automóviles y componentes, maquinaria y equipu industrial, productos químicos o productos metálicos, rellacionando esto coles empreses que n'Asturies se dediquen a ello.

   D'últimes l'eurodiputáu asturianu aportunó na importancia geopolítica del alcuerdu, indicando que supón facilitar l'accesu d'Europa a minerales y materies primes crítiques. Nun vamos agambar en denunciar la infiltración de Vox nel alderique públicu al serviciu d'enemigos de la democracia y de la paz, traidores a España y a los europeos, a sueldu de Trump y de Putin, remató.