UVIÉU, 13 Oct. (EUROPA PRESS) -
L'historiador y editor asturianu Rafael Rodríguez Valdés ganó'l 32 Premiu Xuan María Acebal de poesía n'asturianu, convocáu pola Conseyería de Cultura, Política Llingüística y Deporte, pola so obra 'Histories d'una familia obrera', que percuerre la historia recién de l'Asturies trabayadora dende una mirada na que la memoria familiar y la colectiva avancen xuntes.
Según informa'l Gobiernu asturianu, el xuráu destacó la solidez cola que ta construyíu'l poemariu y la so capacidá pa enxareyar les vivencies personales cola esperiencia de toa una xeneración, hasta componer una biografía que ye al empar íntima, política y xeneracional.
Amás el xuráu valoró la fonda conocencia de la lliteratura asturiana que demuestra l'autor.
El Premiu Xuan María Acebal ta dotáu con 6.000 euros y inclúi la publicación de la obra ganadora. Amás, Rodríguez Valdés va poder incorporase a los circuitos de Asturies, Cultura en Rede, una vía pa llevar la so obra a distintos puntos de la comunidá y averala a nuevos públicos.
El director xeneral d'Acción Cultural y Normalización Llingüística, Antón García, presidió'l xuráu, del que formaron parte Sofía Fernández Castañón, ganadora de la edición anterior, y los filólogos Rodrigo Olay Valdés, Iris Quintana Villa, Alba González Sanz y Taresa Fernández Lorences. Laura Marcos Domínguez, filóloga del Serviciu de Planificación y Normalización Llingüística, actuó como secretaria.
Rafael Rodríguez Valdés ye llicenciáu n'Historia pola Universidá d'Uviéu y especialista universitariu n'Archivística pola UNED.
Foi presidente de l'Asociación de Nuevos Historiadores, entidá qu'entamó delles ediciones de les Xornaes d'Historia Contemporanea na Universidá d'Uviéu na primer década d'esti sieglu, y director d'Erada. Revista d'Historia Contemporanea d'Asturies, publicación de la que salieron trés númberos ente 2007 y 2010.
Coles mesmes, ye autor de diverses publicaciones sobre la historia contemporanea asturiana, ente elles Discursos llingüísticos y movimientu obreru na Asturies decimonónica (Ediciones Trabe, 2009), obra galardonada col Premiu Fierro Botes d'Ensayu del 2008, y El motor de la historia (Ediciones Trabe, 2026), una escoyeta de trabayos publicaos ente 2004 y 2024 qu'enceten la investigación, la divulgación y la reflexón historiográfica sobre'l pasáu recién d'Asturies.
Ente 2012 y 2026 foi responsable del Serviciu de Normalización Llingüística del conceyu de Corvera d'Asturies, dende 2019 coordina la colección Calume d'Ediciones Trabe y anguaño dirixe la mesma editorial.