Los llaboristes holandeses refuguen formar un Gobiernu de coalición cola derecha

Reuters

AMSTERDAM, 18 de Xunu (Reuters/EP)

El líder del Partíu Llaborista holandés, Job Cohen, refugó esti xueves formar un Gobiernu de coalición colos lliberales del Partíu Popular pola Llibertá y la Democracia (VVD) y del Partíu Cristianu Demócrata, lo que supón un estancamientu que retrasaría les midíes contra'l deterioru de les finances públiques.

A la entruga de si-yos prestaba una coalición formada polos trés anteriores partíos, Cohen respondió "nun la quiero", según informó l'axencia ANP-Reuters, que señaló la reunión del llaborista con un conseyeru de la reina Beatriz d'Holanda que sigue les negociaciones.

Los llaboristes, que propunxeron un plan d'austeridá menos agresivu que'l presentáu polos lliberales de Mark Rutte, algamaron 30 escaños, ún menos que los lliberales del VVD, un 20,06 por cientu de los votos nes elecciones parlamentaries celebraes el pasáu 10 de xunu.

La oportunidá de formar una coalición de dereches baltó'l pasáu miércoles cuando l'asesor, Uri Rosenthal, señaló que formar un Gobiernu ente'l partíu ultraderechista y xenófobu Partíu pola Llibertá (PVV), qu'algamó un ascensu vertixinosu al pasar de 9 escaños a 24 nes pasaes elecciones, y el partíu lliberal VVD, podría ser difícil.

Tanto los lliberales como los llaboristes tienen qu'algamar acuerdos con polo menos otres dos formaciones p'algamar la mayoría de 76 diputaos nel Parlamentu necesaria pa poder gobernar.

Los resultaos de les elecciones confirmen el xiru a la derecha del electoráu holandés que supunxo la renuncia del primer ministru saliente, Jan Peter Balkenende, como cabezaleru de los Cristiano Demócrates tres los "decepcionantes" resultaos llograos pola so formación.