UVIÉU, 20 Abr. (EUROPA PRESS) -
Más d'un centenar de docentes d'asturianu y gallego-asturianu tán participando esti miércoles na IX Sestaferia Creatividá y Anovación nel Enseñu de Llingües, entamada por Asturias Formación al traviés del Centru de Profesoráu y Recurso Cuenques Mineres.
El director xeneral d'Ordenación, Evaluación y Equidá Educativa del Principáu, David Artime, que participó na inauguración acompañáu pola alcaldesa de Llangréu, Carmen Arbesú, destacó la vuelta a la presencialidá na celebración de la sestaferia y la participación de más d'un centenar de docentes, "que tán centraos na promoción de la diversidá llingüística y cultural d'Asturies".
Artime señaló que se trata de "una xornada rellacionada cola innovación educativa, mui d'alcuerdu col enfoque competencial que promulga la Llei d'Educación nueva, la LOMLOE".
La Sestaferia celébrase en delles sedes de La Felguera y entemez formación teórica y práctica. El programa d'esta novena edición inclúi una intervención de Xurde Fernández, profesor de Llingua Asturiana y Lliteratura nel IES Candás, sobre aprendizaxe basáu en proyectos, y una ponencia de Pilar Fernández González, profesora de Llingua Castellana y Lliteratura nel IES Alfonso II, sobre evidencies científiques n'Educación.
Amás, programáronse distintes actividaes d'aprendizaxe ludificao, entamaes por Alba Hernández Boada, esperta nesti tipu d'aprendizaxe, y Óscar García Guerra, embaxador de Genially. La sestaferia educativa acueye tamién trés talleres realizaos en Valnalón y na sede del CPR Cuenques Mineres nos que, ente otres temes, van falar de la dinamización de la clase d'asturianu.
