Netanyahu diz que va siguir tentando de formar un gobiernu d'unidá

XERUSALÉN, 23 de Febreru (EUROPA PRESS)

El cabezaleru del partíu israelí Likud, Benjamin Netanyahu, dixo güei que va siguir tentando de formar un Gobiernu d'unidá porque ye "imperativo", dempués de que los cabezaleros del Kadima y del Partíu Llaborista refugaren participar nun gobiernu de coalicción lideráu por él.

Netanyahu sorrayó la necesidá d'unidá porque, según dixo, Israel s'alcuentra nuan situación de "estáu d'emerxencia" y aseguró que nun ye'l momentu pa defender los intereses personales.

"Nunca mos enfrentamos a un estáu d'emerxencia como ésti, cola posible esceición de la Guerra d'Independencia", dixo ante los miembros del so partíu nun conceyu selmanal nel Parlamentu, tres encargáse-y la selmana pasada'l llabor de formar gobiernu.

Esti mesmu día, Netanyahu s'aconceyó col ministru de Defensa y cabezaleru llaborista, Ehud Barak, que refugó la so propuesta y anunció que'l so partíu va tar na oposición. Ayeri s'aconceyó cola ministra d'Esteriores d'Israel y cabezalera del Kadima, Tzipi Livni, cola que nun llogró pesllar un pautu, pero acordaron aconceyase nos próximos díes.

Na so intervención, Netanyahu enumberó los desafíos a los que s'enfrenta Israel, entamando pola situación económica. "Mos tamos enfrentado a una crisis financiera como nun viéremos en munchos años. Tuvimos una crisis financiera nel 2003, pero ésta ye diferente, ye más fondera", dixo.

"Vamos tener que tomar midíes p'asegurar la estabilidá financiera d'Israel pero nun podemos facelo darréu. Supongo que les coses van empeorar enantes de que podamos dar la vuelta a la economía, y eso va requerir unir fuerces y un frente lo más amplio posible pa que podamos aprobar les midíes necesaries" nel Parlamentu.

En cuanto a la situación de la seguridá, según Netanyahu, "Israel sigue sufriendo los llanzamientos de cohetes tanto nel frente norte como'l sur, y l'armamentu nuclear d'Irán amenaza les coses".

"Los intereses personales nun tienen llexitimidá agora y deben apartase a un llau", encamentó Netanyahu. "En vista de toes eses amenaces, la necesidá d'unidá aumenta cada minutu", sorrayó.