Palacios respeta la decisión de Valledor y diz que col pactu de la incineradora ente PSOE y PP "acabó un ciclu políticu"

UVIÉU, 24 de Marzu (EUROPA PRESS)

El director de l'Axencia Asturiana de Cooperación al Dessarrollu, Rafael Palacios, manifestó güei en Xixón respetar al máximo la decisión personal que puea adoptar l'ex diputáu d'IU na Xunta Xeneral del Principáu, Francisco Javier García Valledor, sobre'l so posible abandonu d'IU tres el pactu robláu ente PSOE y PP pa la construcción d'una incineradora en Serín (Xixón).

Palacios, en declaraciones a Europa Press, indicó que la incineradora va afectar a más a de 800.000 asturianos y tachó de "miserable" l'acuerdu alcanzáu ente PSOE y PP, a los que fizo responsables de "envenenar a la población y amás sabiéndolo".

Coles mesmes, calcó en que l'alcuerdu per parte del PP taba basáu "na miseria más absoluta", dao que na so opinión namá queríen facer negociu pa les cementeres.

Nesti sen, alvirtió qu'el so partíu va encargase de qu'esto se sepa, puesto que "los responsables tienen nome y apellíos". Amás señaló que l'acuerdu ta claru que debilita la relación ente les organizaciones polítiques y el Gobiernu de coalición. "Esto demuestra qu'hai un ciclu políticu qu'acabó", apuntó.

Pa Palacios "nun hai proyectu de país nin voluntá de sirvir a los asturianos sinón sirvise d'ellos". Por ello, adelantó que va haber que reflexonar y ver el papel de los Conceyos nel plenu de Coxersa, señaló.

Al so xuiciu la decisión adoptada ye "una vulneración mui grave de la llei", puesto que tendría de ser la incineradora l'últimu recursu. Palacios llamentó que n'Asturies nun se dessarrolla nenguna de les otres alternatives. Coles mesmes indicó "que s'abre un panorama políticu realmente complicáu" y apuntó que Bloque per Asturies va analizar "con calma lo asocedío pero teniendo en cuenta la gravedá de la decisión que xuega cola salú de los asturianos".