Actualizado 09/05/2008 14:21:01 +00:00 CET

Los pilotos d'Air Nostrum confirmen que van dir a la fuelga de seis díes de mayu

Air Nostrum

MADRID, 9 de Mayu (EUROPA PRESS)

Los pilotos d'Air Nostrum confirmaron que van dir a fuelga de seis díes nel mes de mayu, ante "los incumplimientos repetíos del IV conveniu colectivu", per parte de l'aerollinia, informó güei'l sindicatu SEPLA.

Concretamenta, la fuelga, con un 81% del apoyu de los afiliaos al Sepla, va desarrollase los díes 21, 22, 23, 28, 29 y 30 de mayu. Amás, convocaron a otra tolos llunes, martes y xueves de cada selmana, con carácter indefiníu.

La estaya sindical de Sepla n'Air Nostrum "quier dexar claro que la principal torga que la separa de la compañía nun tien que ver con reivindicaciones de carácter económicu, sinón cola falta de respetu demostrada pola emrpesa hacia dellos derechos recoyíos nel actual conveniu colectivu", sorraya nuna nota.

Como principal incumplimientu, los pilotos destaquen les "actuaciones arbitraries en materia de promoción de los profesionales, siguiendo criterios de filiación coles posiciones de la empresa y non d'acuerdu al orde de la llista (basáu n'antigüedá), como recueye'l conveniu".

"La utilización de les polítiques de xestión esterna como midida de presión hacia'l colectivu p'acatar les sos posiciones, l'incumplimientu de les midíes d'adautación de la vida familiar a la llaboral, l'asignación arbitaria de bases ente la plantiya de pilotos, ignorando cualquier procesu previu d'información o convocatoria pa dicha asignación", continúa.

De la mesma manera, denuncie l'incumplimientu del réxime de díes francos tipificáu por conveniu y la imposición de servicios de vuelos nos sos díes llibres, asina como l'ausencia de diálogu y comunicación hacia los representantes sindicales.

Los pilotos d'Air Nostrum van respetar los servicios mínimos que se decreten, col oxetivu de causar les menores molesties posibles a los pasaxeros.