Podemos Asturies afirma que se ta recuperando'l diálogu con IX cola vista puesta nes elecciones de 2023

UVIÉU, 23 Ago. (EUROPA PRESS) -

Podemos Asturies indicó que nestos momentos trabayen en "recomponer el diálogu" con IX y que la "voluntá" ye sumar fuercies con esta formación de cara a les elecciones autonómiques de mayu del 2023.

"Tamos trabayando neso", señaló'l portavoz parllamentariu, Rafael Palacios, que señaló que'l diálogu con otres formaciones de la esquierda "ta nel nuestru ADN". "Tamos en recomponer el diálogu, que ye firme y pue vese en como'l trabayu se reforció na Xunta Xeneral nos últimos meses", indicó.

Per otru llau, la coordinadora autonómica, Sofía Castañón, esplicó que de cara a los comicios van buscar "aunir a toles fuercies de la esquierda". "Ye la intención y el compromisu y neso tamos trabayando", indicó, pa esplicar que la intención de Yolanda Díaz de nun presentase con Sumar pa esa cita electoral nun alteria'l calendariu de Podemos Asturies.

"Asturies tien la so propia idiosincrasia", señaló, pa recordar qu'ellos son una fuercia asturianista. Castañón indicólo asina preguntada polos medios nuna rueda de prensa con Palacios, onde esplicó que'l procesu pa escoyer el candidatu autonómicu nun tien una fecha fixada, "pero va ser bien ceo porque vienen unos comicios y los nuestros procesos son participativos".