Podemos cree "impresentable" el recorte del Gobiernu a los medios de comunicación n'asturianu

UVIÉU, 26 de Xunetu (EUROPA PRESS)

El Grupu Parlamentariu de Podemos Asturies mostró esti domingu la so "sorpresa y malestar" ante lo que consideren un "nuevu capítulu de retayos del Gobiernu de Javier Fernández onde la víctima esta vez ye la cultura asturiana y de manera particular la promoción de la llingua", daqué que consideren "impresentable".

Según destaca Podemos al traviés d'una nota de prensa, na actual convocatoria de sovenciones pa medios de comunicación destinaes al fomentu del usu del asturianu retáyense 47.000 euros en comparanza col añu anterior; esto ye, un 37%. Añaden qu'esti retayu, sumáu al de l'anterior convocatoria, da como resultáu que nos dos últimos años les partíes destinaes a esti ámbitu sufrieren una baxada del 50%.

Al so xuiciu esti recorte ye tovía más grave si se tien en cuenta que'l sector de los medios de comunicación ye unu de los más perxudicaos pola crisis económica.

"Anque nun mos sorpriende porque ésta ye la manera na que vien actuando la FSA nos últimos años nesta materia, sí mos llama l'atención qu'esta midida se lleve a cabu dempués de los acuerdos algamaos ente IU y los socialistes pa la investidura de Javier Fernández, nos qu'unu de los puntos anunciaos ye'l de potenciar los medios de comunicación n'asturianu y gallego-asturianu y la política llingüística", indicó Podemos.

Añade'l grupu parlamentariu que consideren "impresentable y preocupante" qu'una vez más se retayen les partíes que yá de por sí son bien escases, y sin nenguna xustificación.