UVIÉU, 1 Jul. (EUROPA PRESS) -
La conseyera de Cultura, Política Llingüística y Turismu del Gobiernu asturianu, Berta Piñán, presidió esti xueves la xunta constitutiva de la Rede de Normalización Llingüística del Principáu, a la qu'asistieron representantes de 21 conceyos que tienen Serviciu de Normalización Llingüística, y de la Universidá d'Uviéu, que tamién lu tien.
L'oxetivu del organismu ye reforciar la coordinación ente l'Alministración autonómica y los conceyos pa promover l'usu del asturianu y del gallego-asturianu nel so territoriu.
La primer xunta de la Rede valió pa constituyila formalmente y ufiertar información sobre les actividaes desenvueltes polos distintos servicios de normalización llingüística a lo llargo d'esta llexislatura y sobre'l tipu de collaboración que pue establecese ente'l Principáu y la Rede.
Según esplicó'l Gobiernu asturianu al traviés d'una nota de prensa, la Rede de Normalización supón el preséu llegal pa encadarmar oficialmente la collaboración ente l'Alministración autonómica colos distintos conceyos n'asuntos llingüísticos.
L'órganu ta llamáu a desempeñar un "papel fundamental" na regulación territorial de la política llingüística, na creación de servicios normalizadores nuevos, nel caltenimientu de los que yá tán funcionando y na coordinación y desarrollu de l'actividá de toos ellos.
Cuasi la metá de los conceyos tienen unidaes alministratives que s'ocupen de la normalización de les llingües y dan serviciu a más de la metá de la población del Principáu, en dellos casos con servicios propios y, n'otros, acomuñaos con más conceyos.
La estructura de la Rede Normalización Llingüística articúlase nun Conseyu de la Rede que va tener una presidencia y vicepresidencia que van ocupar, respectivamente, les persones responsables de la conseyería y de la dirección xeneral con competencies en materia de política llingüística y un númberu illimitáu de vocalíes que van permitir tener representantes de cada alministración pública o entidá que s'axunte. Nun van percibir retribución dalguna pola so participación.
Ta prevista la creación d'una comisión técnica constituyida por personal técnico de los servicios y de l'Alministración del Principáu. A esta comisión correspuénde-y realizar estudios, proyectos, actividaes, programes, planes y propuestes en materia de política llingüística, pa lo que va poder formar los grupos de trabayu que considere necesarios.
