El Principáu presenta esti vienres el novenu númberu de la revista 'Trabatel'

UVIÉU, 14 Dic. (EUROPA PRESS) -

El director xeneral de Planificación Llingüística y Normalización, Fernando Padilla, va presentar esti vienres el novenu númberu de 'Trabatel, revista eonaviega de lliteratura'. Va ser a los siete de la tarde, na sala Marie Curie de la Casa de Cultura de Tapia.

Esta publicación anual, que ye de baldre, ta editada pola Conseyería d'Educación y Cultura y nació hai diez años pa recoyer la creación lliteraria actual en gallego-asturianu, según informó'l Gobiernu asturianu al traviés d'una nota de prensa.

La entrega nueva ufierta collaboraciones lliteraries de Cristóbal Ruitiña, Conchita Álvarez Lebredo, Alejandro Fernández García, Ángeles Rodríguez Montañés, Javier Fernández-Catuxo, Babel de Cal Cadete, Laura Amor Fernández, Christian Lanza y Fredo de Carbexe. Tamién recueye una traducción al gallego-asturianu d'un cuentu del escritor norteamericanu Dashiell Hammet y reseñes de llibros editaos nesa llingua dende'l númberu anterior.

La revista ta ilustrada con semeyes de la zona occidental d'Asturies, nesti casu, obra de la naviega Verónica Peláez Baniela. Como complementu a la presentación, dalgunos de los autores van lleer fragmentos de les sos creaciones y va celebrase un coloquiu con ellos. Amás, el públicu asistente va recibir como regalu un exemplar de la revista, que tamién se va unviar a los centros educativos y a les biblioteques del occidente.