La Conseyería va aprobar nos meses próximos un proyectu normativu pa convalidar les pruebes d'asturianu yá existentes
UVIÉU, 18 Feb. (EUROPA PRESS) -
La Dirección Xeneral de Política Llingüística del Gobiernu autonómicu va poner en marcha cursos de formación p'adultos adaptaos a les pruebes oficiales de competencia nel usu de la llingua asturiana, onde se recueyen cinco niveles según el Marcu Común Européu de Referencies de Llingües.
Según la información facilitada pola Conseyería de Cultura, Política Llingüística y Turismu a Europa Press, estos cursos --que tamién se van poder facer en gallego-asturianu-- busquen que los asturianos puedan deprender o ameyorar los sos conocimientos llingüísticos al empar qu'ayudar a superar les pruebes de niveles que punxo en marcha anguaño'l Principáu.
Pa eso, va existir una coordinación colos Servicios de Normalización Llingüística "onde los hai y buscando la collaboración d'otres instituciones o asociaciones onde faiga falta", indicaron dende Cultura.
Nestos momentos, Uviéu ye la única de les grandes ciudaes asturianes que nun tien serviciu de normalización, anque ye la sede d'instituciones como l'Academia de la Llingua Asturiana o la Universidá d'Uviéu. Amás, entidaes como'l Conseyu de la Mocedá o la Xunta pola Defensa de la Llingua ufren cursos d'asturianu na capital.
NIVELES DE COMPETENCIA
Los niveles d'asturianu qu'establez el Principáu son el básicu A1, básicu A2, intermediu B1, intermediu B2 y avanzáu C1. En caún va haber una prueba de certificación qu'acreite'l nivel de comprensión y espresión oral y escrita en llingua asturiana.
Esti 2020 ye la primer vez que s'entamen estes pruebes y el Principáu decidió principiar col nivel intermediu B2. A él van poder concurrir un máximu de 500 aspirantes y va celebrase a finales de mayu n'Uviéu. A partir d'ehí van convocase polo menos una vez al añu pruebes nueves pa un mínimu d'ún de los niveles (A1, A2, B1, B2, C1),
Con too, la Conseyería va desendolcar, nos meses próximos, un proyectu normativu qu'estableza los títulos, diplomes o certificaos consideraos equivalentes a estos niveles. Ye dicir, una persona que superara'l nivel básicu d'asturianu podría tener yá l'A1.
Hasta'l momentu, la única prueba que permitía acreitar a los ciudadanos cuál yera'l so conocimientu de la llingua propia d'Asturies yera la 'prueba de conocencia' pal nivel básicu d'asturianu qu'entama dos veces al añu l'Academia de la Llingua.
Otra manera, la mesma institución en collaboración cola Universidá d'Uviéu y el Conceyu de Cangas pon en marcha tolos branos nesi últimu conceyu la Universidá Asturiana de Branu (UABRA), onde los interesaos puen facer un cursu de 15 díes qu'acaba con una prueba final qu'acreita un conocimientu 'avanzáu' del asturianu. Amás, ente otros, hai un cursu d'una selmana de traducción d'otres llingües al asturianu.
