UVIÉU, 23 May. (EUROPA PRESS) -
El presidente del PP d'Asturies y portavoz parllamentariu na Xunta Xeneral del Principáu, Álvaro Queipo, respondió per carta al presidente autonómicu, el socialista Adrián Barbón, que'l PP "nun va negociar reforma dalguna" del Estatutu d'Autonomía.
Queipo formaliza asina'l refugu del so partíu a la oficialidá del asturianu por entender qu'implica "obligatoriedá" como adelantó esti mesmu xueves depués d'una xunta celebrada en Presidencia col mesmu Adrián Barbón y otros portavoces parllamentarios, amás de la conseyera de Cultura, Política Llingüística y Deporte, Vanessa Gutiérrez, y el presidente de l'Academia de la Llingua Asturiana (ALLA), Xosé Antón González Riaño, pa tratar la reforma del artículu 4 del Estatutu d'Autonomía.
Al acabar l'alcuentru'l presidente asturianu animaba a los partíos a reflexonar sobre la oficialidá del asturianu y el gallego-asturianu hasta'l día 11 de xunu, depués de les elecciones europees, pa fixar entós posición y los que tean d'alcuerdu impulsen la reforma estatutaria na Cámara autonómica.
En declaraciones a los medios, Queipo aseguró que'l so partíu "ta a favor del asturianu" pero refuga la oficialidá. Asina, avanzaba que nun va apoyar la reforma del artículu 4 del Estatutu d'Autonomía pero abrióse "a desenvolver la Llei d'Usu y Promoción dende'l consensu".
Na misiva, el líder del PP incide en que la so formación "nun va negociar reforma dalguna". "En respuesta a la proposición formulada pol Presidente del Principáu d'Asturies pa pescanciar la opinión de los grupos parllamentarios sobre la propuesta de reforma del Estatutu d'Autonomía planteada na xunta celebrada esta mañana nel Palaciu de Presidencia, facémos-y saber que, como yá adelantemos en delles ocasiones a lo llargo de los últimos meses, el Partíu Popular, y más concretamente'l so grupu parllamentariu, nun va negociar reforma dalguna del nuestru Estatutu d'Autonomía", indica la carta dirixida a Presidencia y firmada por Álvaro Queipo.
Andalucía
