'Rambalín', de Rodrigo Cuevas, lleva'l Premiu al Meyor Cantar

CENTRO NIEMEYER - Archivo

UVIÉU, 16 Nov. (EUROPA PRESS) -

La tema 'Rambalín', de Rodrigo Cuevas, foi'l ganador de la XII edición del premiu Camaretá al Meyor Cantar. La gala foi esti vienres nel Teatru Fantasio de Navia, pero pol andanciu foi ensin públicu.

Depués d'una fase de preselección, a la final llegaron, xunto al tema ganador, los cantares 'La mesma revolución', de Silvia Quesada, 'Cantar pa durmir un ninín', de Mapi Quintana, y 'L'espeyu', de Slum Suit. El xuráu, presidíu pol director xeneral de Política Llingüística, Antón García, y integráu polos músicos Alicia Álvarez , Pablo Moro y Naomi Suárez, la periodista y escritora Aitana Castañal, y la filóloga y profesora Mercedes Ruisánchez, otorgó por unanimidá'l premiu a 'Rambalín'.

El premiu Camaretá al Meyor Cantar, convocáu pola Conseyería de Cultura, Política Llingüística y Turismu, ta dotáu con 6.000 euros.

'Rambalín' ye una habanera dedicada a la figura d'Alberto Alonso Blanco, Rambal, un personaxe bien popular nel Xixón de les décades 60 y 70 del sieglu pasáu. La so reconocida homosexualidá y el so asesinatu en 1976, un crime entá ensin resolver, dan a la vida de Rambal, según informó'l Gobiernu asturianu esti domingu, la singularidá que reflexa'l tema de Rodrigo Cuevas, que pretende facer una especie de "xusticia poética" cola figura d'Alonso Blanco.

El cantar compónse de dos testos de Fredesvinda La Tarabica, la lletra ye de Rodrigo Cueves y la música del artista uviedón Raül Refree. Rodrigo Cuevas (Uviéu, 1985) tien una trayectoria de reconocíu prestixu na música y nes artes escéniques asturianes y nacionales.