UVIÉU, 19 Ene. (EUROPA PRESS) -
El proyectu 'Al son del cantar' yá tien ganadores de la edición 2021/2022. Nesta convocatoria participaron centros educativos de primaria y secundaria de los conceyos de Cuaña, Navia, Grandas de Salime, Xixón, Cangas del Narcea, Grau, Nava, Sariegu, ??ena, Gozón, Carreño y Castrillón, convocaos polos Servicios de Normalización Llingüística de los conceyos mentaos.
Trátase d'un proyectu en forma de concursu musical pa los cursos de cuartu, quintu y sestu de Primaria y primeru y segundu de la ESO, que quier estimular l'aprendizaxe del alumnáu al traviés de la investigación, el descubrimientu y la creatividá nel campu de la música.
L'oxetivu ye que los estudiantes presenten una canción con lletra n'asturianu o gallego-asturianu escrita por ellos mesmos, sobre una melodía tradicional o sobre una melodía tamién orixinal y propia.
El xuráu destacó la implicación de los centros, la orixinalidá de les propuestes y la tresversalidá que munchos centros consiguieron col proyectu, implicando a bona parte del profesoráu de distintes asignatures. Reconozse amás, como aspectu mui positivu, la participación de distintes etapes educatives, dende primaria a la ESO.
Los centros ganadores nesta edición son El Salvador (Grandas de Salime), con 'El mañá das grandalesas'; Darío Freán Barreira (Cuaña), con 'Xantar'; IES Cangas del Narcea, con 'Cantu a les muyeres'; CRA Lena (??ena), con 'La madreña de mio güela'; Virgen del Fresno (Grau), con 'Les fiestes del añu'; San Félix (Carreño), con '¿Quién será?'; Cabu Peñes- San Jorge (Gozón), con 'Protesta animal'; IES Peñamayor (Nava), con '¡Ye que me presta tanto!'; Salvador de Vega Berros (Sariegu), con 'Gárrate bien fuerte'; y Ramón de Campoamor (Xixón), con 'Marineru'.
El proyectu entra agora na segunda fase, na que les composiciones ganadores van ser versionaes por grupos profesionales poniendo'l so sellu personal y ofreciendo un resultáu que va poder recoyese nun CD.
La Conseyería de Cultura, Política Llingüística y Turismu collabora nel proyectu faciéndose cargu de la producción del discu y de la gala onde se van interpretar les canciones ganadores en directo y que se va facer en mayu del año 2022.
Andalucía
