Ruempen los cristales de la sede del PP d'Ayer y dexen un sacu de carbón a la puerta

UVIÉU, 12 de Xunu (EUROPA PRESS)

La sede del PP del conceyu asturianu d'Ayer apaeció esti martes coles cristaleres rotes dafechu. Amás, los miembros de l'agrupación tamién alcontraron un sacu de carbón a la puerta. El voceru de la formación, Juan Antonio del Peño, yá condenó los actos y dexó claro que, al so xuiciu, "esta nun ye la forma de llograr una solución pa la minería".

Al empar, el representante de l'agrupación señaló que "el PP d'Ayer siempre apoyó'l carbón, igual non pela vía del enfrentamientu pero sí pela negociación colos nuesos dirixentes". Ante esta situación, del Peño púnxose en contactu colos representantes de los sindicatos nel conceyu p'acordar un alcuentru y "falar de lo asocedío".

Al empar, los representantes de l'agrupación yá avisaron a la Policía Llocal, que redactó un informe sobre lo asocedío, y presentaron una denuncia ante la Guardia Civil. Según fontes de la investigación, el socesu prodúxose "poco dempués de les dos y media de la mañana".

Esti actu vandálicu prodúxose namás trés díes dempués de que la sede apaeciera cubierta por güevos. L'alcalde del conceyu, David Moreno Bobela, condenó lo asocedío y señaló qu'esti socesu "atenta contra la democracia". Tamién anunció que ta avisando al restu de voceros nel Conceyu pa enviar un comunicáu nel que van mostrar el so refugu conxuntu ante lo asocedío.