Salú confirma 66 positivos nuevos y el fallecimientu de dos muyeres de 84 y 89 años n'Asturies

UVIÉU, 30 Sep. (EUROPA PRESS) -

La Conseyería de Salú del Principáu d'Asturies confirmó 66 casos nuevos de coronavirus diagnosticaos esti martes, amás del fallecimientu de dos muyeres de 84 y 89 años. La última vivía nun centru residencial sociosanitariu.

Sobre los positivos nuevos, el Gobiernu asturianu señala en nota de prensa que "toles persones afectaes permanecen asintomáticas o con síntomes leves y aislaes nes sos cases". El Serviciu de Vixilancia Epidemiolóxica sigue coles investigaciones pa determinar la vinculación de los casos detectaos.

Amás, diez persones diagnosticaes en díes anteriores precisaron hospitalización en planta y nun hubo ingresos nuevos na UCI. El Sespa realizó ayeri 3.528 pruebes PCR, con positividá del 1,87%.

Per otru llau, el rastrexu a los habitantes del llugar ponguetu de Sobrefoz dexó detectar cinco positivos nuevos vinculaos a esti brotu. El Serviciu de Vixilancia Epidemiolóxica encamentó la realización d'esti rastrexu y d'otru en Xomezana Riba (L.lena), en detectando dellos casos de coronavirus en dambes localidaes, nes que vive población vulnerable.

Per otru llau, el brotu rellacionáu con dos establecimientos del polígonu industrial de Porceyo, en Xixón suma 13 positivos. Hasta'l momentu, 24 persones respondieron al llamamientu realizáu poles autoridaes sanitaries.