El Sespa realiza peñeraos en dos llugares de L.lena y Ponga, en detectándose dellos positivos

UVIÉU, 28 Sep. (EUROPA PRESS) -

El Serviciu de Salú del Principáu d'Asturies (Sespa) empezó a realizar peñeraos en Xomezana Riba (L.lena) y Sobrefoz (Ponga) en detectándose 7 y 3 casos positivos, respectivamente, y ser poblaciones vulnerables al coronavirus.

Según indiquen dende'l Gobiernu autonómicu en nota de prensa, les pruebes empezaron esta mañana pa 72 habitantes del llugar l.lenizu, onde s'instaló un dispositivu especial con personal del área sanitaria VII, con cabecera en Mieres.

Esti martes habilitaráse otru con profesionales del área VI, con cabecera en Les Arriondes, pa tomar muestres a los 40 vecinos de Sobrefoz. "Dase la circunstancia de que Ponga nun rexistrara nengún positivu por COVID dende l'empiezu del andanciu", apunten dende l'Executivu.

Coles mesmes, el Sespa acabó esti mediudía la toma de muestres a 600 adolescentes de Llaviana que dieron negativu por coronavirus la selmana pasada. El Serviciu de Vixilancia Epidemiolóxica previera esti segundu peñeráu pa reparar la circulación del coronavirus, porque la medría de casos se produció nesa franxa d'edá.

64 CASOS NUEVOS N'ASTURIES

Nel conxuntu d'Asturies, la Conseyería de Salú confirmó 64 contaxos de coronavirus diagnosticaos esti domingu. Una persona precisó ingresu hospitalariu y les demás permanecen asintomátiques o con síntomes leves, aislaes nes sos cases.

Per otru llau, cuatro persones diagnosticaes en díes anteriores tuvieron qu'hospitalizase, y otros dos ingresaron na UCI. Nun se rexistraron fallecimientos nuevos por covid-19. Anguaño, n'Asturies hai 14 persones hospitalizaes n'UCI y 49 en planta.

El Sespa efectuó ayeri 1.711 pruebes PCR, con resultaos qu'asitien la tasa de positividá nel 3,74%.