TPA programa pal día de Nuechebona 'Los Bolechas' y 'Los Goonies'

UVIÉU, 20 Dic. (EUROPA PRESS) -

La Televisión del Principáu d'Asturies (TPA) va emitir a lo llargo de la xornada del 24 d'avientu dos producciones con doblaxe al asturianu. Trátase de la serie infantil 'Los Bolechas' y del llargometraxe 'Los Goonies', tou un clásicu de los ochenta.

La primera ye una serie familiar dirixida al públicu infantil qu'algamó un éxitu grande en Galicia, onde lleva delles temporaes. Estrenada en TPA en 2014, pel momentu yá se pudieron ver dos temporaes nel nuestru idioma. El sábadu, a partir de les 9.15 hores y a lo llargu d'una hora, va emitise la reposición de dellos capítulos.

Per otru llau, na tarde de Nuechebona, a les 18.40 hores, TPA va emitir el llargometraxe 'Los Goonies', una película d'aventures nortemaericana de 1985 que se convirtió en tou un clásicu de la dómina. La cinta yá se pudiera ver n'asturianu'l 8 de setiembre d'anguaño, coincidiendo cola programación especial del Día d'Asturies.

Amás de doblaxes al asturianu, la televisión autonómica tamién incluira más conteníos especiales coincidiendo col fin de selmana de Nuechebona. Asina, esti vienres 22 va poder volver vese a partir de les 22.20 l'espectáculu teatral 'Lo que te dea pola gana'. Depués, a las 00.05 va emitise'l documental sobre Los Ilegales 'Mi vida entre las hormigas' y yá a la 1.15 hores de la madrugada 'Xuacu Amieva: onde l'agua ñaz'.

Otra manera, en Nuechebona, depués del tradicional mensaxe de Navidá de SM El Rei, TPA emitira un especial de los programes musicales 'De romandela' y 'Cantadera'.