UVIÉU, 20 Nov. (EUROPA PRESS) -
El presidente del Comité d'Empresa d'Alu Ibérica n'Avilés, José Manuel Gómez de la Uz, reclamó esti vienres al presidente asturianu, el socialista Adrián Barbón, que "dea la cara" y que reclame al Gobiernu central la intervención de les plantes de Coruña y Avilés.
Nunes declaraciones realizaes énte'l Palaciu de Presidente, onde se concentraron dellos trabayadores, De la Uz indicó que realizaben esa acción "porque'l presidente del Gobiernu asturianu nun nos quixo nunca recibir".
Nesi sentíu, señaló que Barbón "polo menos podría facer como otros gobiernos", ente los que mentó al gallegu Alberto Núñez Feijóo, pa reclamar al Executivu central la intervención de les plantes.
El Grupo Riesgo ye'l propietariu de les plantes d'Alú Ibérica (antigua Alcoa) n'Avilés y A Coruña, depués de mercar la parte mayor del paquete accionarial a Parter Capital. Una operación que toles alministraciones desconocíen.
Por eso, De la Uz llamó al Executivu autonómicu a que "dean la cara por nós" y reclame al Gobiernu central la intervención de les plantes al traviés de la SEPI.
Amás, el presidente del Comité d'Empresa recordó que nun saben nada de l'Alministración central dende'l 28 de xunu. "Sentímonos desamparaos y tamos nun camín hacia'l precipiu", indicó.
