Villa nun comparecerá esti martes ante la Xunta pol so "síndrome confusional"

DAMIÁN ARIENZA

UVIÉU, 3 de Payares (EUROPA PRESS)

L'exsecretariu xeneral del sindicatu mineru SOMA y exparlamentariu socialista José Ángel Fernández Villa nun va comparecer esti martes ante la Comisión d'Economía, que va analizar les propuestes que presenten los grupos y va decidir si se solicita información médica adicional pa clarificar si la so negativa a dar esplicaciones na Xunta Xeneral ta o non xustificada.

Asina lo indicaron esti llunes los grupos parlamentarios tres la Xunta de Voceros, apuntando l'acuerdu de "dase por enteraos" del escritu enviáu pola muyer del exlíder sindical, "con un parte médicu adxuntu que fai referencia al síndrome confusional" que traxo l'ingresu hospitalariu de Fernández Villa, que yá recibió l'alta.

El voceru socialista, Fernando Lastra, llendóse a señalar qu'a los grupos escápense-yos les razones médiques treslladaes pola familia pa xustificar la incomparecencia del exsindicalista. "El reglamentu nun diz que s'analicen les circunstancies invalidantes, sinón si se xustifica o non la incomparecencia. Nun-y vamos dar más vueltes; si daquién quier preguntar si ye temporal o permanente, que lo faiga", dixo.

Al respecto, el restu de voceros parlamentarios adelantaron que van buscar víes pa llograr que Villa dea esplicaciones sobre la so presunta fortuna oculta de 1,4 millones d'euros ante la Xunta Xeneral. D'esta manera, na Comisión d'Economía d'esti martes van analizase propuestes pa disponer de más información sobre l'estáu de salú de Villa o fórmules alternatives pa qu'empreste declaración.

Tanto la vocera de Foru Asturies, Cristina Coto, como'l voceru d'IU, Aurelio Martín, y el diputáu d'UPyD, Ignacio Prendes, coincidieron na posibilidá de solicitar información médica adicional qu'acredite si'l "síndrome confusional" diagnosticáu a Villa "ye temporal o permanente" y esclárase en qué grau afecta a les sos capacidaes, dao que "nun consta que tea incapacitáu xudicialmente".

Pela so parte, la diputada del PP Emma Ramos planteó como alternativa a la so comparecencia en sede parlamentaria la opción de tresllada-y preguntes per escrito pa que respuenda ante la Xunta Xeneral sin "forzar" el so estáu de salú pola presión mediática.

Amás, dende Foru rexistraron la so propuesta de creación d'una Comisión d'Investigación sobre la xestión nes obres d'ampliación del puertu d'El Musel. La so vocera, Cristina Coto, anunció la intención de que se debata en sesión plenaria, anque nun va dir nel orde del día d'esta selmana.

Sí van tratase nel plenu previstu pa esti xueves y vienres, ente otros asuntos, el caltenimientu y promoción del Camín de Santiago al so pasu per Asturies; una reprobación a la conseyera de Fomentu, Ordenación del Territoriu y Mediu Ambiente, Belén Fernández, pola so actuación al respecto d'El Musel; la xestión de les polítiques actives d'empléu; el cambiu de la Llei de Servicios Sociales; o l'estáu del Salariu Social Básicu.