Von der Leyen anuncia l'aplicación provisional del alcuerdu con Mercosur

    BRUXELES/UVIÉU, 27 Feb. (EUROPA PRESS) -

   La presidenta de la Comisión Europea, Ursula von der Leyen, anunció esti vienres qu'empecipia'l procesu pa l'aplicación provisional del alcuerdu de llibre comerciu axustáu per Bruxeles colos países de Mercosur, dempués de qu'Arxentina y Uruguai completaren los sos respectivos procesos de ratificación nes últimes hores.

   "Trátase de resiliencia, de crecedera y de qu'Europa forxe'l so propiu futuru", dixo la xefa del Executivu comunitariu nuna curtia declaración ensin preguntes na sede de la institución en Bruxeles, dempués d'incidir en que'l Conseyu (gobiernos) yá dieron lluz verde en xineru a Bruxeles pa proceder a l'aplicación temporal cuando fuera posible.

   La conservadora alemana recordó amás que dende la firma del pactu dexó claro que la Unión taría llista cuando los países de Mercosur lo tean y que'l ritmu de ratificaciones per parte de los socios iberoamericanos dexa yá poner en marcha'l procesu del llau européu, ensin esclariar la fecha esacta en que prevé la so entrada a valir.

   La Unión Europea y los países de Mercosur roblaron el pasáu xineru los alcuerdos políticu y de llibre comerciu colos que les dos rexones remataron casi 26 años de negociación y establecen un nuevu marcu de relaciones, que sal alantre pese al refugu del campu européu y de media docena de países europeos, ente ellos Francia y Polonia.