UVIÉU, 28 Oct. (EUROPA PRESS) -
El portavoz de Vox na Xunta Xeneral, Ignacio Blanco, acusó esti miércoles al presidente del Principáu, el socialista Adrián Barbón de "xuguetear col ñácaru del monstruu nacionalista llamáu oficialidá".
"Ayeri volvimos comprobalo. Oxalá dalgún día pueda esportar les sos habilidaes llingüístiques a la so xestión política. Parez pensar que la única cultura ye la que se fai en bable", dixo Blanco na segunda xornada del Debate d'Orientación Política.
Pal diputáu de Vox, la política llingüística supón "traducir hasta llibros de la saga de 'El Señor de los Aniellos' al preciu de 6.000 euros la unidá, a amigos de Podemos". Una política "ideolóxica" que, según dixo, llega a los dos millones d'euros "mentes que'l Camín de Santiago recibe 112.000 euros anuales, o Cuadonga nada".
Blanco acusó a Barbón de ser "el paciente cero" de la segunda fola del andanciu como "impostáu representante del milagru sanitariu asturianu". "La segunda fola ye consecuencia de la vanidá de la so campaña de marketing", dixo Blanco.
El portavoz de Vox llegó a afirmar que tolos asturianos perdieren dalgo na crisis sanitaria. "Toos menos usté, usté ganó", señaló Blanco, qu'acusó a Barbón de valise d'una enfermedá pa proyectar la so "imaxe pública". "Mentes qu'usté xubía al cielu de la popularidá, Asturies baxaba a los infiernos de la enfermedá", señaló.
